US State Department na altura di mericano perdi na Aruba

ORANJESTAD – Departamento di Estado Mericano (US State Department) ta na altura di e informe oficial di un ciudadano mericano perdi na Aruba. Ademas Guarda Costa mericano –cu ya ta na Aruba relaciona cu un operacion di narcotica-, a duna un man na e buskeda di e mericano Joseph Grady (38). E sub hefe di Guarda Costa mericano, Ryann Doss a confirma cu ‘autoridad hulandes a notifica nos di e caso di un ciudadano mericano cu a bay kite boarding cu su instructor y cu no a bolbe’. Y varios medio di comunicacion mericano ta cubriendo e storia aki. Nan ta haciendo esaki cu ayudo di e propio famianan di e homber. Den e caso aki, e prometida di e homber mes ta alertando prensa mericano. Entre nan a manda mail pa varios canal di television di Florida. Mientrastanto na Aruba, aparte di un comunicado di prensa di polis, no ta dunando mucho mas informacion riba e caso aki. 

HELICOPTER GUARDA COSTA MERICANO

Manera cu NoticiaCla.com a raporta caba, segun Doss, e oficial di Guarda Costa mericano, e la confirma cu a ‘fia’ autoridad di Aruba un helicopter pa ‘yuda cu e buskeda’. Nan ta bisa cu nan a wordo notifica diasabra mainta di e desaparicion.

DEPARTAMENTO DI ESTADO

Departamento di Estado mericano ta na altura di e situacion caba. “Den casonan cu ciudadanonan mericano ta confirma di ta perdi, e embahada of consulado mericano ta traha hopi serca cu e famia di e persona perdi, e pais anfitrion, y autoridad mericano pa monitor cualkier investigacion y provee tur asistencia consular posibel” un oficial di e departamento a declara diasabra.

AVENTURERO

Segun e tio di e homber perdi, Patrick Repper, Grady (e homber perdi) a sali riba un boto di 10 pia, y cu Grady ta e tipo di homber aventurero.