Minister kier Utilities, Web y Elmar investiga pakico recibonan a sali asina halto

 ORANJESTAD – Minister di Utilidad (Energia) Glenbert Croes diaranson a informa cu e kier pa Utilities, Web y Elmar investiga pakico recibonan di awa y coriente a sali asina halto. Segun e mandatario, Gobierno di Aruba a introduci un aumento temporal di 24% riba e tarifa di awa y coriente cuminsando na luna di September. “E aumento temporal aki ta debi na e crisis energetico causa pa e guera entre Rusia y Ukraine” e mandatario a sigui bisa. “Lamentablemente a tuma nota cu na momento cu pueblo a ricibi nan recibo di awa y coriente, e montantenan no tabata cuadra cu e subida di 24%, sino un aumento mucho mas halto. Hopi ta esnan cu via medionan di comunicacion social a expresa nan disgusto pa cu esaki mirando cu ya caba costo di bida ta halto y no lo por sobrevivi pagando asina tanto placa na utilidad” e mandatario ta sigui bisa. 

INVESTIGA

Den cuadro di e problematica aki, e mandatario a bisa cu e la acerca e directornan di e companianan estatal, Utilities, Web y Elmar pa pidi nan cooperacion den investiga kico por a bay robes y coregi esaki debidamente lo mas pronto cu ta posibel. E meta di gobierno ta pa alivia e peso cu tin actualmente riba e pueblo, pa loke ta trata costo di bida. P’esey proyectonan manera e expansion di e Parke di Molina di Biento na Rincon ta di gran beneficio. No solamemente e ta energia renobabel y limpi pero ta genera electricidad hopi mas barata, pa Aruba no keda depende di prijs di petroleo halto

CONTENT CU HEDGE

E minister a expresa di ta contento di wak cu Web Aruba NV a cuminsa cu e proceso di hedging pa asina stabilisa prijs di awa y coriente. Mundo completo ta bibando un momento di crisis energetico cu tin un impacto grandi riba costo di bida y p’esey gobierno ta haciendo nan maximo esfuerso pa bin cu solucionnan pa e comunidad di Aruba por sobrevivi y e companianan estatal tambe.