KPA: Probablemente Turista y doño di watersport perdi riba lama

ORANJESTAD - Riba diabierna 3 di april 2015, personal di Strand Politie a haya un yamada pa mas o menos 7:45pm di un turista femenino bisando cu su amigo, e turista masculino John Joseph Grady, a sali for di 9:00am pa bay tuma les di “kite surfing” for di Fernando Dulce, cu ta doño di e negoshi “Extreme Winds”. Segun declaracion di e pareha, e dama D.W., nan mester a topa bek na Ritz Carlton Hotel pa 12:00pm pero John Grady no a aparece. E pareha a purba varios biaha di tuma contacto cu John Grady pero te na e ora menciona e no a aparece y no tabata contesta su celular. Polisnan di Strand Politie a pidi e señora pa pasa personalmente pa haci un noticificacion oficial. Pa mas o menos 8:15pm e dama D.W. a presenta y a confirma e notificacion. E no tabata sigur si John Grady y Fernando Dulce tabata riba lama ainda of lo por tabata na tera. Mesora Strand Politie y Polis Maritimo hunto cu Kustwacht a cuminsa prepara pa buskeda. Strand Politie a sali hunto cu e dama D.W. riba caya y a cuminsa un buskeda tanto na sitionan turistico, unda turistanan sa bay relaha normalmente despues di watersports y despues na e adres unda nan ta hospedando y otro sitionan di interes pa cu e investigacion. Pa mas o menos 11:00pm Kustwacht a cuminsa cu buskeda riba lama debi cu e buskeda na tera no tabata dunando resultado. Aki a haci uzo di nan botonan, avion den aire pa patruya y helicopter. Te na e momentonan aki e buskeda ta andando ainda y ta den man di Kustwacht y Polis Maritimo, mientras cu personal di Strand Politie ta investigando keto bay na tera. Pa sigura cu ta tene cuenta cu tur aspecto den e buskeda, a institui un “Task Force” den cual a inclui varios departamento di Polis y otro instancianan di Gobierno, tanto local como internacional. Di acuerdo cu proceduranan normal, e ekipo di “slachtofferhulp” di Cuerpo Policial Aruba ta envolvi y ta acesorando e dama D.W., brindando tur tipo di sosten den e momentonan dificil aki. Cuerpo Policial Aruba ta pidi tur persona cu por a mira tanto Fernando Dulce of John Grady, sea ayera of awe pa por fabor tuma contacto cu Central di Polis na number di telefon 100 of via e ‘tip lijn’ na 11141 pa suministra informacion.