E locutor mas popular di Aruba Ruben Garcia ta den Noticiacla LIVE awe!

ORANJESTAD – Awe nochi, e locutor mas popular di Aruba, Ruben Garcia ta e invitado di Noticiacla LIVE. Loke ta haci e programa ‘diferente’ e biaha aki ta cu e lo por contesta pregunta, ya cu e programa lo ta completamente BIBO. Durante e programa awe nochi, cu ta cuminsa pa 9’or, Ruben lo conta su storia di e reto cu e tabatin atrobe cu su salud, su bida awor, y kico tur por spera di dje di awor en adelante. Ruben siendo un persona super popular, ta hala atencion unda cu e ta y kico cu e haci. E ta wordo compara cu personahenan di edad halto cu ainda ta haciendo loke nan a haci henter nan bida, sin cu e ta un problema. Entre nan, por pensa riba un ‘Casey Casem’ of un ‘Dick Clark’ cu ta personanan cu a sigui anima te na grandi, y cu a keda acepta sin ningun problema. Hopi biaha ora cu un persona yega cierto edad den e ramo aki, e tin cu retira pa duna chens pa e ‘genero nobo’. Den e caso aki sinembargo , Ruben a sa di reinventa su mes di tal forma cu e ta sigui forma parti di e plaforma di diversion na Aruba, y tin un exito tremendo riba e tereno aki. No perde e programa interesante aki awe nochi cuminsando pa 9’or.