Premier Eman cu otro tono cu Yrausquin, den reaccion pa Gobernador

ORANJESTAD – Premier Mike Eman dialuna atardi laat den un carta (lesa e carta aki) di 5 pagina, acompanja pa un cantidad di 'bijlage', esta cartanan di prueba a pidi gobernador Refunjol un biaha mas pa firma e presupuesto 2014 pa asina evita mas retraso, y para eventual mas daño cu e pais ta sufriendo a consecuencia cu e presupuesto no ta firma. Mes momento e ta delinea un total di 12 contradiccion cu e rapport a señala. Na final sinembargo, e ta duna gobernador e ‘promesa cu su gabinete lo ta dedica na garantisa finanzas solido pa un periodo duradero’. Ademas e ta admiti cu su gabinete ta di acuerdo cu e rapport, den sentido cu mester enfoca mas riba 2015 y menos riba 2014.

Den su splicacion, por haya hopi di e declaracion y promesanan cu su colega minister Juan David Yrausquin a haci durante su reaccion publico mas tempran dialuna. Solamente den e caso di e carta, Eman tabata mucho mas diplomatico, y den ningun frase di e reaccion na gobernador, ta desprecia y cuestiona gobierno hulandes of e College Financieel Toezicht. E lenguaje tabata uno totalmente respetuoso, y digno di un premier.

Awor ta keda na gobernador di Aruba pa tuma e reaccion den consideracion, y dicidi si e ta acepta e splicacion di Eman su gobierno, y firma e presupuesto. Esaki, no obstante cu su colega algun rato prome, a lansa critica na tanto e comision pa a ‘ridiculisa’ e presupuesto, y na e mandatario hulandes cu e ‘lo mester baha’ si e comision a traha un rapport cu tabata na fabor di gabinete Mike Eman II.