Carta di trahadonan di Arubahuis ta bati alarma riba ex minister na Hulanda

ORANJESTAD/DEN HAAG – Segun un carta cu Noticiacla.com a haya den su poder recien, ex minister plenipotenciario na Hulanda, Guilfred Besaril lo a comete varios infraccion pa cual ‘e no por (a) bin bek’ den su funcion. Mester bisa mesora si, cu e carta (un copia di un email) ta data di mei 2021, y cu mientrastanto e persona en cuestion, esta sr Besaril a retira caba di e funcion. E carta/mail ta cita e.o. problemanan logistico personal pa cual e lo no por a sigui mas den e funcion. E carta (email) ta bin cu varios cos serio cu supuestamente lo mester tabata e base pa a inicia un investigacion ‘independiente’ riba e tema.

E MAIL

E mail ta traha pa un grupo, segun nan mes ta bisa, simpatisantenan di MEP, pero a opta pa ta ‘anonimo’ pa miedo di repercussion. E preocupacion ta referi e tres ultimo añanan di e prome termino di Besaril den su funcion, unda cu e lo a ‘crea preocupacion serio, haci cosnan etico y moralmente incorecto, y actua di un forma incorecto y no etico pa cu su funcion. 

PRUEBA

E grupo a bisa di a acumula un cantidad grandi na material como prueba, pa mustra kico nan ta papiando di dje. Entre prueba tin transaccionan financiero y sumanan cu prueba concreto, cu ta mustra segun e grupo, cu Besaril no a actua segun e standar cu ta conta pa integridad. 

URGENTE

E peticion tabata pa trata e caso urgentemente, mirando cu (e tempo ey) tabatin un eleccion na caminda y tabatin miedo cu e informacion lo a sali, creando problema pa e partido. Ademas nan tabatin miedo cu lo a bolbe pone Besaril riba e lista di MEP y cu chens cu e por bolbe Hulanda y haci como si fuera nada a pasa. 

KICO E LA HACI

Ta papia di cosnan bergonsoso cu e ex gevmin lo a haci, manera e forma di organisa e Arubadag di aña 2018 y 2019, y unda cu Besaril lo a surpasa e presupuesto di e evento cu no menos cu 50 mil euro. Despues di su postulacion, e grupo ta sigui bisa, Arubahuis a sufri perdida grandi.  E grupo ta papia di e Arubadag di 2019, unda cu Besaril lo a contrata un amigo comerciante pa organisa e evento pa cual awe ainda Arubahuis ta den cora pa 20 mil euro. Otro acusacion cu e grupo ta bin cu ne, ta (nan ta bisa di tin prueba) , gastonan haci rond di e cas di Besaril na Hulanda, acusando e ex mandatario di a paga 20 mil euro na adaptacion na su cas, sin cu lo tabatin palabracion haci cu e doño di e cas. Ta haci mencion di un sistema di alarma nobo di 10 mil euro y  4 mil euro na landscaping. Tur esaki ta incomprendibel pa e trahadonan, siendo cu tin un cas bashi para pa cual Aruba ta gasta 10 mil euro na mantencion. Tambe Besaril lo tabata usa e VIP lounge na Schiphol y declara e gastonan aki, siendo cu e tabata biahando priva pa Italia. E carta ta uno basta elabora, cu ta dirigi na prome minister Evelyn Wever Croes, pidiendo pa un investigacion. Click AKI pa e carta /mail.