Robert Candelaria ta bolbe KPA como Comisario di departamentonan special

ORANJESTAD – Robert Candelaria ta bolbe Cuerpo Policial y e biaha aki como Comisario di departamentonan special. “Mi por confirma esey” minister di husticia Rocco Tjon a bisa noticiacla.com diaranson mainta. “Tawatin un selectie procedure y Candelaria a wordo voorgedragen door di e comision” e mandatario a bisa. Sr Candelaria mes tambe a confirma e informacion. E ta cuminsa 1 november awor den su funcion nobo. Mas aleu, Candelaria a confirma cu e departamentonan cu ta cay bou di dje lo ta entre otro tur loke no ta surveillance diensten of recherchediensten. Dus pues departamentonan manera Grens, ME, K9, verkeer etc. “Hopi diversifica” Candelaria a sigui bisa.

PASADO

Candelaria a bandona cuerpo algun aña atras (2010) cu bvvd, y a establece su mes na Corsou como hefe di seguridad di un hotel grandi. Despues e la bin Aruba bek na 2017, subi lista politico berde y bira Parlamentario entre 2017 y 2021. Den e ultimo eleccion e no a logra haya suficiente voto pa bolbe den Parlamento. Despues di un aña, e ta bolbe cuerpo di polis den su funcion nobo.