UPB y PDB hayando otro pa forma gobierno na Bonaire

KRALENDIJK – E partidonan politico Union Patriotiko Boneriano (UPB) y Partido Demokratico di Bonaire (PDB) ta den negoshacionnan serio pa formacion di gobierno. Y informacion di fuentenan fidedigno di NoticiaCla.com ta raporta cu tin un acuerdo firma caba entre e dos partidonan aki. Esaki ta nifica cu,- mientras e prome indicacion tabata cu e partido Movimento di Pueblo Boneriano (MPB) di Elvis Tjin Asjoe lo a forma e gobierno-, mas probable ta mustra awor cu e lo por keda afo. Tjin Asjoe mes a reacciona sorprendi riba e informacion aki diabierna mainta pa NoticiaCla.com: “Oh, ok. Ami no sa di nada”, Tjin Asjoe a sigura NoticiaCla.com riba e informacion cu UPB y PDB a firma un acuerdo.

NEGOSACION

Manera ta conoci, ya ta 2 siman cu negoshacionnan entre e tres partidonan menciona ta tumando lugar. Mientras cu loke ta parse un negoshacion trankil y transparente di pafo, paden ta mustra mas bien cu cos tabata basta pega. Informacion cu NoticiaCla.com tin tambe, ta cu den e partido blauw tin un discordia y hopi di nan, lo ta pa motibo di e lider politico mes. Critica cu e lider lo ta poniendo mas enfoke riba otro cos, asina desviando di e negoshacionnan, ta pone cu e situacion no ta mucho positivo den e partido. Mencion di e.o. parada di victoria, viahenan continuo pa Aruba, ta entre e critica cu tin riba e lider di e partido blauw. Riba esaki, NoticiaCla.com no a haya e reaccion di Tjin Asjoe.

PART TIME

E problema na Bonaire ta cu esnan cu ta miembro di conseho insular, tin esaki como un ‘part time job’. Esey ta nifica cu den siman nan tin un trabou regular, cu ta pone cu nan mester reuni y negosha despues di nan ora ‘regular’ di trabou y den fin di siman. E fin di siman di pasco grandi un biaha mas Tjin Asjoe a biaha pa Aruba y lo ta bek otro siman. Algo cu e otro partidonan lo no a aprecia.  Un di e problemanan tambe cu tin ta cu mirando e resultado di e eleccion, MPB lo ta reclamando pa haya 2 di e tres puestonan di diputado (tin 3 posicion habri), y di e dosnan, pa tin e cartera mas pisa di nan.

STRUCTURA ESTATAL

Bek pa e informacion confirma, tin un entendimento solido firma entre e dos partidonan UPB y PDB, pa loke ta futuro structura estatal y un referendum pa Bonaire prome cu fin di 2015. E acuerdo aki, ta nifica cu practicamente tur cos ta cla pa e formacion keda formalisa y anuncia, posiblemente otro siman mes of prome. Foto archivo cortesia di Aimed Ayubi.