PPV disponibel di celebracion 40 aña Doble R na Corsou pa Aruba

ORANJESTAD -  Diasabra awor tin e celebracion di 40 aña di Doble R na Corsow na unda lo tin un concierto cu lo cuminsa for di 7or di anochi en bibo directamente for di World Trade Center na Piscadera. Y pa fanaticonan di Aruba por disfruta di esaki, SETAR Cable Services ta ofrece un PPV special di Afl.35.

Lo bay tin presentacion di entre otro Sidney Isidora, Mr Saab, Gilbert Gibi Doran, Romeo Heyer, Ompi Stefania, Orlando Naño Rosario, Marlon Vitorina, for di Aruba Jersey Isenia y for di Hulanda Cesar Gua Gua Amasia. Pa aplica mester yama 525-1700 of pasa personalmente na cualkier Teleshop di SETAR of SETAR Store. E PPV aki ta keda transmiti riba canal 100.

Manera ta conoci Doble R Super Stars ta un grupo cu origen di Corsow, cu a manifesta den su interpretacionnan e gozo di Salsa y e entusiasmo pa ricibi un aña nobo yen di alegria manera den 1977 na unda nan a cosecha varios exitonan musical. Te hasta tin un tema "Den mi 77" cu lo keda un joya musical di Caribe. Den decadanan 70 Doble R a cosecha hopi exito tanto na Antiyas como Hulanda y te hasta a organisa fiestanan cu full orkesta na unda tur hende ta baila full anochi.

Recientemente na Corsow durante e North Sea Jazz Festival a duna tributo na un di e musiconan di mas renombra di Corsow cu ta, Rignald Recordino, mihor conoci como Doble R cu a dirigi e banda cu su Super Special Stars. Rignald Recordino ta conoci tambe como un di compositornan di mas famoso di Corsow. Durante transcurso di añanan ela crea mas di 800 composicionnan.

Atraves di e musica di Doble R a purba di trece mensahenan positivo pa hende. Ela bira un ehempel pa otro compositornan di con pa compone cancionnan y con pa duna canticanan nificacion. Mayoria di e canticanan ta combina tur tipo di musica manera salsa, merengue, jazz, tumba y tambu. Musica manera cu Dobel R y su SSS a produci no ta bini mas awendia y tabata durante un temporada den cual hopi ta esnan cu tabata hala mesa cu stoel y baila den nan propio sala of veranda. Exitonan di Doble R ta inclui cancionnan manera "Señor Speransa", "Tin un cambio", "Content'i mirabu" Ta Ki Te Kos", Skelemeleze, "Cruel Realidad", "djasabra" y mucho mas. Diasabra dia 4 di april lo tin PPV disponibel pa conmemora e celebracion di 40 aña di existencia di Doble R y su SSS via canal 100. Pa aplica por yama 525-1700 of pasa personal na cualkier Teleshop di SETAR of SETAR Store.