Centro di e ola tropical lo pasa pazuid di islanan ABC

MIAMI/ORANJESTAD – Tur cos ta mustra cu e centro di e ola tropical cu a haya e nomber Invest 91L, lo pasa pazuid di islanan ABC den curso di dia awe. E ta un area grandi situa net dilanti Costa Norte di Venezuela y pazuid di nos y ta sigui produci un area extensive di yobida y tormenta. E ubicacion cerca di tera Venezolano lo strobe di desaroya durante e proximo 2 dianana, pero asina cu e pasa nos, e ta mustra di por forma den e siguiente depresion tropical.

ARUBA

Aruba ta pronostica di haya entre 22 y 45 mm di awa segun Meteo. E meteorologo David Barkmeyer a splica NoticiaCla cu e hecho cu ta papia di 50 pa 100 mm, ta pasobra esey ta conta pa tur tres isla y e area Venezolano. Pero pa Aruba specificamente e cantidad ta bira menos. Claro cu e por aumenta, pasobra tempo ta keda algo dificil pa pronostica cu exactitud. 

DOWDOW ta prepara pa sali ora cu e mal tempo pasa, pa mira unda mester di asistencia. A admiti cu e tera ta satura caba pues por spera mas problema cu simanan anterior dependiendo di e cantidad di yobida cu Aruba registra. No tabata necesario si pa decretal un crisis pasobra e no a bira un tormenta oficial cu nomber. NOTA: Potret ta di National Hurricane Center.