Vitrina Final Impresionante y Conmovedor di Art Rules 5

Oranjestad – E vitrina final di Art Rules Aruba 5 a produci un tremendo spectaculo di cuater ora, cual a cuminsa cu un exhibicion di fotografia y moda, y a culmina cu un produccion teatral riba un escala grandi, aumenta cu video y film, baile, musica y presentacionnan dramatico. Mas di 200 hoben local a participa den Art Rules Aruba 5 su edicion di e aña aki, produci pa Ira & Ayra Kip di e Fundacion di The Pancake Gallery. Nan a experiencia dos siman di tayer intensivo den nuebe disciplina creativo cu DJ, Musica & Presentacion, Baile, Teatro, Arte Culinario, Moda, Media Creativo y un tayer special titula Art Rules Junior pa hobennan entre 9 pa 12 aña.

Art Rules Aruba a gradici mayornan y e sponsornan di e sector priva, encabesa pa RBC Royal Bank, pa nan contribucionnan cu a permiti e muchanan pa habri nan halanan artistico y practica auto-expresion, creatividad y busca nan mesun voz. Den un sala completamente yen na Cas Di Cultura, e publico a gosa di un serie di film inteligente y sorprendentemente fresco, presentacionnan musical profundo cu a pone nan pensa, piesanan teatral hilarico, ademas di segmentonan di baile anima sin inhibicion, como tambe un intercambio en bibo cu Ayra y Ira Kip tocante nan aventura comparti como rumannan morocho, for di nan infancia te cu nan a bira adulto, y nan camindanan di carera individual y alaves bon conecta.   

Un pabien ta bai na e ekipo di maestro internacional y local, kendenan usando nan habilidadnan experto a desaroya e hobennan talentoso di Aruba, y a inspira nan pa subi pa un nivel impresionante di originalidad y profesionalismo. Na nomber di e fundacion di Pancake Gallery, un danki ta bai na tur e sponsornan generoso cu a haci e dos simannan fantastico posibel, plantando y sembrando simiñanan artistico den e curasonnan di tur esnan cu a participa. E rumannan morocho tambe a gradici nan mayornan, pa nan encurashamento solido y constante den transcurso di e añanan.