ATIA: Simplemente hisa BBO, bo ta straf e comerciante cu ta cumpliendo

ORANJESTAD - Simplemente hisando e BBO bo ta “straf” e comerciantenan cu ta cumpliendo awo, pero bo ta no ta bai tras di esunnan cu no ta cumpli cu ley. Asina e gremio comercial Aruba Trade and Industry Association (ATIA) ta bisa diaranson, reaccionando riba e anuncio di gobierno riba e cambionan cu ta drenta na vigor 1 januari 2023. “Como ATIA nos ta para tras cu e decision tuma pa hisa e BBO, ta esun “facil” pero no miho pa nos isla. E reforma total di nos sistema di impuesto lo eventualmente benificia Aruba paso e cumplimento cu e leynan stipula lo ta mas miho, e “compliance” manera nos a vocifera den pasado” e gremio ta cuminsa na bisa. E mas tristo segun ATIA, ta cu un reforma total no lo bin na vigor na aña 2024 tampoco, paso ta aña di eleccion, manera Minister di Finansa (Xiomara Maduro:red) a splica den e rueda di prensa. “Pues un eleccion ta mas importante cu economia di Aruba unda nos tur como ciudadano ta traha duro pa nos pan di tur dia?” e gremio ta puntra

 STRAF COMERCIANTE 

Simplemente hisando e BBO bo ta “straf” e comerciantenan cu ta cumpliendo awo, pero bo ta no ta bai tras di esunnan cu no ta cumpli cu ley segun ATIA. Tambe mester tene na cuanta, cu prijsnan di producto lo wordo afecta directamente pa un decision asina. “Como gremio comercial nos ta keda enfoca cu mester baha gastonan structural di nos aparato gubernamental. Si baha gasto gubernamental y hisa compliance (cumplimento cu ley), den varios area di impuesto, porta no mester hisa tarifanan mes, pero esaki lo tuma mas esfuerzo di nos Departamento di Impuesto y Gobierno di Aruba”. “ATIA ta continua pa bisa cu nos ta spera cu Gobierno lo sigui traha riba e reforma fiscal den un manera prudente pa nos isla, pa tuma e decision corecto y no esun facil of popular” e gremio ta finalisa bisando.