NHC: Irespecto di desaroyo di e disturbio, islanan ABC por haya awacero torencial

MIAMI – Irespecto di desaroyo, islanan ABC por experencia awacero torencial y inundacion local, acompaña cu rafaga di biento. Asina National Hurricane Center ta raporta awe mainta riba e disturbio cu ta oost di Isla Riba awe mainta. NHC ta pidi esnan den e region aki, esta tambe islanan ABC, pa monitor e progreso di e sistema aki. E chens pa desaroyo di e sstema ta basta halto, cu 60% den 2 dia y 80% den 5 dia.  

HURRICANE HUNTER

Un avion di hurricane hunters ta investigando e disturbio oost di Isla Riba actualmente pa adkeri data actual. Mientrastanto segun e boletin di 8’or awe mainta, e disturbio ta sigui produci areanan grandi di awacero desorganisa y tormenta. Imagen di radar di Barbados ta mustra cu e sistema no a desaroya miho anda desde ayera. Sinembargo cu bientonan na nivel halto ta pronostica pa bira mas condusivo pa desaroyo, y un depression tropical por forma dentro di e proximo dianan si e sistema sigui riba awa moviendo direccion west cu velocidad di 15 miya pa ora.