Detencion di chauffeur envolvi den e accidente fatal ta eminente

ORANJESTAD – E chauffeur cu ta sospecha di a causa e accidente tragico diadomingo cu a cobra 3 bida, ta sospecho di husticia pa Ministerio Publico. Esaki a keda confirma diamars na NoticiaCla pa vocero di Ministerio Publico, Ann Angela. Ta bisa sospecha pasobra investigacionan mester prueba oficialmente cu e tabata esun cu a origina e accidente. Sinembargo e pensamento general ta cu e tabata esun cu a causa e accidente, debi cu ora cu a test e pa alcohol, a registra un nivel halto di alcohol den su curpa. Y como tal esaki por a influencia su reaccion pa cu e accidente fatal. 

DOOD DOOR SCHULD

Segun vocero di e ministerio, ta sospecha e chauffeur di ‘dood door schuld’osea culpabilidad pa morto di otro. Pero como cu e persona ta hospitalisa ainda pa su heridanan cu e la sufri, ‘e proceso ta para ainda’, Angela a bisa. “ Una vez e sali y ta riba pia, ta sigui trata cu ne como sospechoso den e caso” Angela a sigui bisa. NoticiaCla a compronde cu no ta descarta cu esaki ta nifica cu lo detene e ora pa cuminsa e proceso conforme ley di Wetboek van Strafvordering van Aruba articulo 73. E ley ey ta stipula cu ora cu e persona keda deteni, e ta wordo transporta mesora pa un lugar di interogacion y ta aparece despues dilanti un fiscal of fiscal suplente pa e responsabilisa su mes pa su actonan. NoticiaCla a compronde cu ta cuestion di tempo y asina cu e persona bandona hospital, lo pasa pa su detencion.