Jandino y Bon Bini Holland 3 ta gana premio publico di Gouden Kalf

DEN HAAG – Despues di un siman di combersacion no mucho facil, e sondeamento pa un proximo gobierno Hulandes a drenta su di dos siman. Sondeador Plasterk ta ricibi awe Wilders, Van der Plas, Yesilgöz y Omtzigt. E prome siman a cuminsa malo ora cu mester a reemplasa e prome sondeador despues di apenas un dia. Plasterk diabierna a papia di un bon ambiente diabierna, y tabatin mester di mas tempo pa papia cu esnan principal politiconan awe. 

DEN HAAG – Secretario di estado demisionario Hulandes pa Enseñansa, Cultura y Ciencia, G. Uslu a haya su retiro entrante awe 1 di December di Rey Willem-Alexander. Esaki pasobra Uslu ta bay asumi un funcion den sector priva, bolbiendo e compania cu e y su ruman a lanta, Corendon, y lo asumi e posicion di CEO. Mientras cu no nombra un secretario di estado nobo, minister cu e mesun cartera, Dijkgraaf ta tuma e tarea temporalmente

DEN HAAG – E resultado oficial di eleccion pa Tweede Kamer ta confirma cu partido PVV ta e partido di mas grandi di Hulanda.  Oficialmente PVV ta logra 37 asiento, 20 mas cu den 2021. Groenlinks/PvdA ta bira e di dos partido mas grandi (25 cu 8 mas, pero corda cu e ultimo eleccion e partidonan a participa independientemente. VVD ta perde 10 asiento y ta bin na 24 asientio y e partido nobo NSC di Pieter Omtzigt ta logra 20 asiento. Un total di 38 candidato a haya suficiente voto preferencial pa por saca nan mes. Pero mayoria di nan lo a drenta Tweede Kamer toch, sin e votonan ey.  Di e 13.5 miyon votadornan, 10.4 a vota cu ta haci e porcentahe 77.7 mas abou cu 2021. 

DEN HAAG – Sondeador Plasterk a continua awe diahuebs cu combersacionan cu demas lidernan politico Hulandes cu a haya asiento den e ultimo eleccion. Plasterk ta papia awe cu Jetten (D66), Van der Plas (BBB), Bontenbal (CDA), Marijnissen (SP), Baudet (Forum voor Democratie) y Ouwehand (Partij voor de Dieren). Ta e intencion cu otro siman e ta presenta su relato na Tweede Kamer. 

DEN HAAG – Lider di partido PVV Geert Wilders kier pa su partido sinta na mesa cu partidonan BBB, NSC, VVD. Despues di su combersacion cu e sondeador Ronald Plasterk, Wilders a bisa cu e no mester ta pa ki tipo di gabinete ta bin of kit area cada persona ta haya. Segun e, no mester tin taboe riba esey aworai. “Mi preferencia ta pa un gabinete mayoritario, of uno minoritario. Papia cu otro, kita e peso di mesa. Wak si bo tin similaridadnan di programa y si bo ta confia otro” Wilders a sigui bisa. Plasterk a papia cu demas lidernan politico di e partidonan mas grandi cu a haya asiento. Aki un siman, e tin cu presenta resultado di su sondeo. 

DEN HAAG/ ORANJESTAD - Entrante otro aña di estudio, mas of menos 120 studiante pa aña por bay pa intercambio of stage den Reino pa medio di e asina yama Koninkrijksbeurs. Esaki ta un programa nobo di mobilidad pa tur studiante den Reino, cu ta enfoca riba aumenta e intercambio di studiante pa termino cortico. Recientemente, e prome cinco studiantenan Caribense a cuminsa na Hulanda cu un Koninkrijksbeurs. Pa e aña di estudio aki, ta spera cu mas of menos 25 studiante lo haci uzo di esaki. Koninkrijksbeurs ta un di e medidanan pa yuda studiante Caribense den nan carera di estudio.