Programa ambicioso di Sail Aruba 2015 ta conoci

ORANJESTAD – E programacion pa e evento di Sail Aruba ta conoci. Awe mainta esaki a keda anuncia publicamente, y ta mustra di ta uno bastante amplio. E actividadnan canto di lama lo bai man den man cu e Open Dag anual di Korps Mariniers cu e aña aki ta celebra 350 aña di existencia, un kid’s corner, caminatanan den centro di ciudad y e tan spera Sail in Cinema cu ta wordo patrocina pa Renaissance Resort & Casino.

ORARIO

E evento di dos dia completo ta cuminsa ya caba for di 10’or di mainta. Publico lo por parkeer nan vehiculo den cercania di e Waf di Oranjestad, sea na entrada otro banda di Bushalte principal of na e entrada di Freezone biew pa asina subi tereno di waf pa disfruta di un Seafood Festival bon surti, un Mercado Liber, hasi bishita na tur e barconan den waf, of atende e exhibición di Aruba Ports Authority “The Heartbeat of Oranjestad” na e terminal crucero, y careda di boto miniatura dilanti di Cas di Gobernador.

ACTIVIDAD DI MARINIERNAN

Durante dia tambe lo tin demostracion di e actividadnan di custumber di e mariniernan cu ta inclui demostracion di Boarding Boat, di Search and Rescue, y tambe di e grupo di K-9. Nan lo tin standnan di cuminda y bebida unda e publico por disfruta di e dushi musica y e ambiente canto di lama. Actividadnan diurno lo tuma lugar na mesun ora ariba Diasabra dia 2 di mei tambe.

CAREDA

Ademas di esaki e Aruba Sailing Association lo organiza caredanan pa yatenan local, Sunfish y Beach Cats cu lo competi den awanan den sercania di e Puerto di Oranjestad. E caredanan lo wordo oficialmente inicia pa e participantenan mas jong den e “ Optimist class” ariba Diabierna di mei . E hobennan Nicole van der Velden y Thijs Visser lo tuma un descanso cortico di nan obligacionnan Olimpico pa regresa Aruba pa duna workshops di catamaran sailing pa e miembronan mas hoben di Sailing Youth Watersports Aruba (SYWA).

DIABIERNA ANOCHI

Diabierna anochi (dia 1 di mei) lo tin presentacion di e produccion Hulandes cu tin mas aña activo, esta Soldaat van Oranje. Pa 7:30 pm e productornan y artistanan internacional lo ofrece e publico presente e oportunidad unico pa presencia e acto aki den un version modifica caminda cu nos heroe nacional, Boy Ecury, lo wordo recorda por medio di su historia cu lo wordo treci padilanti durante di e espectaculo. Ariba tur dos anochi famianan y amantenan di pelicula clasico lo tin e oportunidad pa disfruta di e Sail in Cinema patrocina pa Renaissance Resort & Casino cerca di e Marina. Riba Diabierna y Diasabra, 9:00 y 8:00 respectivamente bishitantenan por wak e pelicula Pirates of the Caribbean y e pelicula Jaws, for di riba tera of for di riba lama. Esaki definitivamente lo ta un experiencia unico cu bo no por falta!

200 AÑA REINO HULANDES                                                                                                                                                                                                                                           

E festividadnan di Sail Aruba 2015, lo tuma lugar en coneccion cu conmemoracion di 200 aña di Reino Hulandes. E comision “Viering 200 jaar Koninkrijk Aruba” ta responsabel pa coordina e programa di Sail Aruba 2015. Esaki lo ta e evento nautico/maritimo mas grandi cu a yega di tuma lugar na Waf di Oranjestad. E evento ta habri pa publico y lo inclui areanan cu ta cay bou di hurisdiccion di e autoridad portuario manera e awanan rond di waf, incluyendo e Schoener Haven. Sponsornan activo den organizacion ta inclui: Aruba Ports Authority N.V., Marinierskazerne Savaneta y Kustwacht Caribisch Gebied, SEL Maduro & Sons, NOW! Advertising, y DIVI Resorts.

Pa mas informacion por subi ariba e pagina www.facebook.com/sailaruba of bishita e webpage www.sailaruba.com .