Banco awor ta cobra cliente extra pa cumpra dollar of euro

ORANJESTAD – For di ayera, banconan comercial di Aruba ta cobra e cliente cu haci uso di servicio di cambio di moneda, un suma extra. Esaki ta resultado di e ley cu a drenta na vigor 1 di april (ayera), -e asina yama State Ordinance Exchange Rate Margin-  , y cu e banconan tin cu simplemente cumpli cune. E suma aki, segun un comunicado cu a keda publica pa e asosacion di banco na Aruba ' tin cu financia e gastonan di Banco Central'. No ta bisa exactamente kico e gastonan aki ta. “Banconan lo wordo cobra 3/8% (0.375%) riba tur benta di dollar of euro, y ta wordo recompensa pa tur compra di dollar y euro” presidente di Asociacion di Banconan di Aruba (ABA), Pierre Rafini a confirma na NoticiaCla.com. “Mirando cu esaki ta un gasto hopi grandi riba e banconan comercial, e intencion ta pa pasa door pa e cliente cu ta cumpra ‘foreign exchange’ (cumpra dollar of euro). Segun Rafini, e desicion pa pasa e cobransa door pa e cliente, ta uno unanime di tur banco, pues tur e banconan aki lo cobra e cliente esaki bek.

GASTO HALTO

Rafini a splica cu banconan lamentablemente ‘no por absorba e gasto aki mirando cu ya caba gastonan operacional a subi. Como tal mester cobra esaki na e cliente. Pa un persona compronde esaki, e ta nifica cu un persona cu bay cumpra 100 dollar, e tin cu paga su 1.3% di e ‘deviezen provisie’ (exchange tax), cu ta 1.30 dollar. Banda di esaki e tin cu paga e 0.375%. Contrario na pensamento cu lo tabatin un ley asina caba, esaki no ta e caso. “Semper nos tabata bende e dollar na 1.80 banda di e 1.3% di exchange tax. Esey so, y awor esaki ta bin acerca.