Tempo instabil den zona a genera varios hos riba laman awe

PALM BEACH – Diahuebs mainta, e situacion di tempo tabata di tal forma cu esaki a genera algun hos riba laman, pero bon bisto for di tera. Riba e hotel strip di Palm Beach esaki tabata bon bisto y den careda di 10'or y mei por a nota varios di e hosnan. For di varios dia caba e stuacion di tempo ta instabil cu ta pone cu e islanan ABC ta haya retonan interesante. Corsou p.e. tabatin un anochi yena cu strena cu lamper, y Aruba basta awacero varios caminda. 

METEO

Segun servicio meteorologico, ta e humedad y inestabilidad den region debi na actividad di zona di convergencia intertropical ta responsabel pa e tempo asina cu lo por induci temporalmente hopi nubia. “ Esakinan por produci localmente algun awacero breve durante proximo 24 ora cu tambe chance pa lamper cu strena” e pronostico valido te cu awe tardi, tabata bisa. Potretnan ta cortesia di Julisa Arends-Hoevertsz