Cantidad di hende campando e aña aki ta menos

ORANJESTAD – E aña aki un total di 213 permiso pa campamento a wordo otorga, cu ta traduci den un total di 4278 hende cu lo ta campando na Aruba. Esaki ta 16 permiso menos y 56 hende menos cu aña pasa. Esei no ta kita afo cu e cantidad ta keda importante y cu a pone mas polis pa por controla e areanan aki for di fin di siman cu a pasa te cu dia 12 di april. Banda di e sitionan normal, tin tambe e asina yama ‘Rancho’ cu tambe lo keda controla.

REPARTICION PA DISTRICTO

Reparti pa districto, por menciona cu Noord a haya 107 permiso, cu ta bon pa 2354 hende (e grupo mas grandi), sigui pa Playa cu tin 20 permiso cu 352 hende, Santa Cruz 3 permiso cu 38 hende, San Nicolas 83 permiso y 1534 hende. Na Baby Beach como cu a drecha e area, por permiti trailer solamente na cierto parti.

PERMISO CONTROLA

Loke cu polis ta controla ora cu nan pasa na e sitionan di campamento, ta e permiso. “E mester ta visibel pa manera cu polis yega, por wak e”, vocero di polis Liliana Rasmijn a bisa NoticiaCla.com. Ademas ta controla pa medio di e permiso, si loke tin, ta cuadra. Por ehempel. Si ta 5 tent tin riba e permiso, pero ta bin haya 8. Tambe ta controla pa no haci bbq riba beach, pa asina por cuida e santo blanco. Musica ta permisibel te cu 10’or di anochi den siman y 12’or den fin di siman. Tur esaki contal cu e no ta stroba esnan cu ta campa rond. “Tambe tur famia cu ta campando, mester tin un ‘first aid’ kit. Y ora cu cla cu campeer, haci e lugar limpi pa Serlimar por pasa piki esaki” Fuera di riba tera, polis lo usa nan seccion maritimo pa controla e parti riba laman tambe. E operativo aki lo continua te dia 12 di april proximo. Foto archivo cortesia KPA