Parlamento: Wanta suspension maestra y sigui caso contra SKOA

ORANJESTAD –Gobierno ta sigui cu su caso contra Stichting Katholiek Onderwijs Aruba (SKOA), y no por suspende docente Croes di Scol Preparatorio Kudawecha te ora termina un investigacion contra dje. Esaki ta e resultado di casi 16 ora di un reunion parlamentario cu a produci no menos cu 9 mocion. Y entre e mocionnan aki, otro minister di gabinete Mike Eman ta sobrevivi uno di desconfiansa contra di dje. Un reunion cu a test e maneho di minister di enseñansa Michelle Hooyboer. Pa lesa e mocionan mes, click riba e parti 'blauw' di e texto corespondiente di e mocion. 

CLARIDAD

E reunion yama pa partido MEP, tabata pa trata e dos puntonan menciona y wak si por trece e claridad necesario den e asuntonan aki enves di dividi e comunidad mas. Loke a hala atencion ta e forma con a vota tambe pa e mocionnan na final di e reunion aki, mustrando toch cu parlamento no semper ta vota ‘segun partido’, sino mas segun consenshi di e parlamentario.

MOCIONAN DI MEP

E mocionnan cu mas a hala atencion ta e prome dosnan, presenta pa partido MEP. E prome ta pa urgi gobierno retira e carta di suspension y reinstitui e maestra concerni bek na e scol, mientras cu e di dos mocion ta pa presenta e maneho riba medidanan disciplinario dentro di tres luna. Pa e 2 mocionnan aki, presidente di parlamento Marisol Lopez Tromp como unico miembro di su fraccion, a vota na fabor, aunke e no tabata suficiente cu 9 voto (incluyendo 8 voto di partido MEP), contra 11 di AVP (Melvin Tromp no a vota). Lopez a vota pa un mocion mas presenta pa partido MEP.

VOTAMENTO Y DISGUSTO

E votamento aki a causa disgusto serca e miembronan di sindicato SIMAR cu a sigui e reunion maratonico te na final. Nan a mustra nan disgusto y bandona e sala e momento ey.

MOCIONAN DI MEP

E mocion di MEP pa paga debe di SKOA completo y asina percura pa e school geld por baha, no a haya sosten y aki a bay bek pa e votamento tradicional di 12-8. Un mocion cu a haya aprobacion mayoria tabata tambe uno di MEP cu ta pidi pa un estudio pa por introduci enseñansa gratis. Algo cu for di comienso tur dos partido a mustra di ta na fabor. Esaki a pasa cu 19 voto na fabor. E ultimo mocion di MEP tabata esun di desconfiansa, y aki atrobe no tabatin e sosten necesario y a vota ‘tradicional’ esta 12-8, esta cu otro mandatario di e gobierno a sobrevivi un mocion.

MOCIONAN DI AVP

E siguiente 4 mocionnan tabata di partido AVP. Entre nan tabatin uno pa sostene e maestronan den nan funcion, cu a haya aprobacion di 20 miembro. Mocion number 7 ta pidi pa haci un auditorio riba tur fundacion den enseñansa cu ta traha cu fondo publico. Esaki tambe a pasa cu 20 voto na fabor. E mocion # 8 di AVP ta papia di un asina yama ‘time out’ pa e respectivo maestro y percura pa e por haya e guia necesario. Aki e votamento tambe tabata dividi 11-8 na fabor di AVP. Finalmente mocion # 9 tabata pa condena tur forma di termento (bullying) na scolnan, cu manera a spera, a conta cu aprobacion unanime (den e caso aki 20 voto) di parlamento.