Minister no a logra nada concreto ainda na Merca pa heavy fuel oil mas barata

ORANJESTAD – E bishita di minister Glenbert Croes no a logra nada concreto awor pa baha prijs di cumpra heavy fuel oil. E mandatario a splica cu a sinta cu tur e partidonan necesario, pero ta awor tin cu bay traha un peticion ‘oficial’, cu conseho di minister e siman aki tin cu aproba pa bay Merca. E ora Merca lo dicidi ‘oficialmente’ si por honra e peticion di Aruba. E mandatario a bisa si cu durante su bishita, e la ‘sinti’ cu Merca a mustra comprension pa e situacion y ‘tabatin oido’ pa e asunto. A compronde cu no ta Aruba ta e unico cu tin e problema aki, pero mas isla den region. 

BIAHE PA MERCA

E mandatario a duna un splicacion basta amplio dialuna mainta unda cu e la repasa tur e reunionan cu e la tene cu varios departamento oficial manera Departamento di Estado, Departamento di Finanza y Consulado Hulandes na Merca (cu ta esun cu a yuda regla e reunionan), pero cu no a logra nada concreto (ainda).