Pabien na Archivo ( Historico) Nacional di Aruba cu su 20 aña official, y su 26 aña-inofficial

ORANJESTAD - Trudy Hassell a manda un palabra di felicitacion grandi pa tur e empleadonan y staf di Archivo ( historico) Nacional di Aruba cu nan cumplimento official di 20 aña di existencia y 26 aña in official. “Tawata na aña 1988 ora mi a bin bek for di Hulanda, despues di a caba cu e studio di Middelbaar Archiefambtenaar na Den Haag y a traha na Algemeen Rijksarchief na Den Haag, Hulanda, cu mi a regresa Aruba, y ariba orden di sr. Ciso Martis, q.e.p.d., a cuminsa traha ariba e archivonan semi-statico y statico ( historico) cu tawata tin “warda” no solamente na Bestuurskantoor di e tempo ei, pero tambe na varios otro departamento y persona/ instancia priva y na ex-Rialto.” “E encargo cu mi a haña di defunto sr. Ciso Martis , cu e tempo ei tawata hefe di Bureau Interne Diensten, tawata pa lanta e Archivo ( Historico) Nacional, pasobra e tawata tin e conviccion cu e archivonan historico di Aruba mester wordo preserva. Conhuntamente cu ne, mi a cuminsa jama departamentonan, instancianan priva y personanan pa mira kendenan lo tin archivonan historico, pa nos pasa busca nan. Asina aki poco poco archivonan tawata drenta". Na un dado momento el a tuma e decision cu mi lo bai sinta na e edificio di Ex-Rialto den Steenweg na Playa, pa asina realmente cuminsa cu nos Arichivo Historico Nacional. "Cu cooperacion di sr. Ciso Martes mi a haña un persona pa yudami, esta sr. Vito Petrocchi, cu cu alma y cuerpo a cuminsa yuda ordena e diferente cahanan di archivo y hunto cu mi nos a cuminsa pone un structura den e archivo. Ainda mi ta corda e prome dia cu mi a pone pia den e edificio di ex-Rialto y mi a realisa cuanto historia tawata tin warda akiden. Mi a hasi mi mes e promesa e dia ei di lo traha cu alma y cuerpo pa lanta e archivo aki pa Aruba tambe por tin su historia verifica y autentico".

Mientras cu nan tawata trahando einan, varios investigador a hasi estudionan den e archivonan, procedente di Aruba, Hulanda y Venezuela. Na aña 1988 a tuma e decision, mirando e importancia di e archivo aki pa Aruba cu mester emplea mas persona pa traha den e diferente departamentonan di e Archivo Nacional aki, manera den e seccion di restauracion y inventarisacion. Asina, danki na e cooperacion di sr. Martis, q.e.p.d. y e gobierno di e tempo ei, a tuma un par di empleado den servicio, cu a yuda mas ainda pa duna contenido na e archivo. Un docente specialisa den restauracion di archivonan a bin for di Venezuela, y a entrena un par di e coleganan aki con pa restaura documentonan. Alaves a cuminsa cu e parti audio-visual, pa asina e archivo audio-visual, cu naturalmente ta contene hopi informacion y historia di nos isla tambe keda conserva. E tempo ei a purba di mantene e archivonan den un clima adecuado pa nan, pa asina nan conservacion ta garantisa. Alaves a cuminsa papia tocante di digitalisacion di e archivonan pa tin esakinan como back up, pa dia cu e archivonan pa un of otro motibo bai perdi toch, tin ainda e informacion disponibel.

Na aña 1988 a tene e prome exposicion official di e Archivo ( historico) Nacional in oprichting, cual a tuma lugar na ex-Rialto y tawata tin como tema: Nos status Aparte di 1986. Akinan famianan di nos Libertador Betico Croes, q.e.p.d., a trece e busto cu a wordo traha pe y a expone pa prome biaha pa public o di Aruba. Alaves a duna un bista di e historia cu a conduci na nos Status Aparte cu documentonan y potretnan di Archivo Nacional.

“Despues cu mi a wordo nombra como hefe di BID na aña 1990-1995 mi a purba di engrandece e Archivo Nacional aki, cual tawata forma parti di Bureau Interne Diensten como e archivonan statico, un tiki mas. E tempo ei e archivonan di gobierno di Aruba tawata cai bou di Bureau Interne Diensten, y tawata dividi den archivonan dinamico, archivonan semi-statico y archivonan static ( historico) Durante cu mi tawata hefe di Bureau Interne Diensten a drenta e informe cu decision a cai cu entrante augustus 1994 lo kita Archivo Nacional for di bou di Bureau interne Diensten y ta bira un departamento ariba su mes. Despues di esaki mi a bai Hulanda y pasa over pa studia pa mi actual posicion. Ora mi a bin bek mi a mira un Archivo Nacional para ariba su pia, un bunita sala di exposicion y organisando actividadnan pa informa y educa nos pueblo. Pabien y danki pa sigui hiba e vision di sr. Ciso Martis y di mi padilanti. “

Cu Archivo ( historico ) Nacional cumpli hopi aña mas di existencia! PABIEN!