Minister a haci declaracion riba fecha di carnaval a crea confusion

ORANJESTAD – Mei mei di preparacion pa mal tempo pa Aruba, un declaracion di un minister riba su pagina di Facebook a bolter henter un discusion riba un tema cu lo no mester tabatin prioridad awor. “Carnaval ta cuminsa despues di 3 Rey”. E declaracion ‘simple’ aki di minister di Cultura Xiomara Maduro diahuebs riba su pagina di Facebook, a crea hopi confusion. Esaki pasobra no a splica mas cu djis e texto” Minister di Cultura ta informa: Carnaval ta despues di 3 Rey # MinFiC”. Algun a relate na e relato di e siman aki di Stichting Musica, (tambe publica riba NoticiaCla:red) cu a informa cu for di November di e aña aki caba ta inicia cu e Festival di Caiso y Soca Monarch envez di na januari di 2023 manera ta custumber, ora cu aña bolter den temporada ‘regular’ di carnaval. E declaracion di e minister a duna di pensa cu lo no ta di acuerdo cu e punto di Musica, y cu pa kita tur duda, ta pone e mensahe cu ‘carnaval’ ta cuminsa despues di Tres Rey (6 di januari). 

REACCION

NoticiaCla a busca contacto cu e mandatario en cuestion pa un clarificacion pero ainda no tabata exitoso. A compronde di otro medionan cu presidente di SMAC Darren van Ommeren no tabata cla pa duna un comentario riba e tema aki. Y no a logra haya reaccion di e Stichting Musica tampoco. Ta keda pendiente pa e reaccion y e noticia den proceso.