- De Kort: Gobernantenan mester coregi buraconan cu tin den nos leynan actual
- Na Corsou, gobierno kier aumenta “Normering Topinkomens” di 295 mil pa 385 mil
- Na Hulanda, e basis beurs ta bin bek den e proximo aña escolar
- Joran vd Sloot a dicidi di bringa su extradicion pa Merca toch!
- Opinion: Reaccion di Vacation Rental Professionals Aruba riba e informe huurmento di casnan vacacional y capacidad di carga
IMSAN a celebra cu e di 500 pashent a keda trata exitosamente cu radiotherapia
ORANJESTAD – Diahuebs merdia IMSAN a celebra cu e di 500 pashent a keda trata exitosamente cu radiotherapia. Pa esaki a tene e ceremonia di ‘ring e bel’ door di e pashent en cuestion. Na e occasion aki, minister di Salubridad Publico Sr. Dangui Oduber a bay ImSan pa yuda conmemora e hecho aki. Tabata riba dia 2 di april di aña 2020 cu e departamento di radiotherapia a trata nan prome pashent y na 11 di november di aña 2020 e di 100 pashent. Un proyecto e cu Gobierno a kere aden, a pone fondonan disponibel cu awor ta dunando su fruto.
MASTERPLAN
Segun informacion di gobierno, henter e masterplan di expansion di ImSan a cuminsa oficialmente na april di aña 2018 y tabata un inversion grandi di 60 miyon florin. Den e masterplan a percura pa bin cu un departamento di radiologia cu su CT-Scan y un departamento di policlinica di wowo caminda ta haci operacion di retina. A construi salanan di operacion cu mashinnan avansa, cu ImSan su mesun anestesista pa asina haci operacionnan ey mes. Tambe a bin cu un departamento pa sterilisacion di ekiponan medico y converti ImSan den un hospital di estadianan corto cu 22 camber. A bin cu un “Spoed Eisende Hulp” cu cambernan pa ricibi ambos adulto como mucha y claro sin laga afor e departamento di Radiotherapia.
Esaki a nifica cu pashentnan residencia aki na Aruba no mester bai mas den exterior pa esaki. Esaki ta significa cu e pashentnan lo keda den su seno familiar. Na mes momento esaki lo reduci e costonan di AZV pa cu pashentnan cu ta wordo manda den exterior pa tratamento di radiologia. Tambe a percura pa pone 1 miyon florin di AZV disponibel pa percura pa e cambernan den ImSan bai den uzo pa pashentnan por pasa anochi na e hospital.
E minister encarga a felicita e director encarga, Dr.Joel Rajnherc y full team di ImSan Aruba y partners Di Miami Cancer Institute y Baptist Health. Awe ImSan a marca historia un biaha mas y ta considera e “milestone” aki como uno historico pa cuido medico y cu nos tur na Aruba mester ta orguyoso di dje.
Fluho di biento di oost te zuidoost lo pone tempo bira mas calor
ORANJESTAD – Segun Servicio Meteorologico di Aruba, e situacion general di tempo pa proximo 24 ora ta mustra cu un fluho di biento for di oost te zuidoost lo pone tempo bira mas calor den oranan di merdia y atardi te atardi laat, motibo pa cual tin un aviso pa calor excesivo. Di otro un banda no ta spera awacero diimportancia den proximo 24 ora. For di diabierna pasa tin un alerta pa calor excesivo na vigor, valido te cu diamars atardi 6pm. No ta conoci si esaki lo keda extendi.
Total Services Aruba a disculpa pa saco di sushi tira den area di Barcadera
ORANJESTAD - Total Services Aruba a disculpa dialuna atardi pa un incidente cu a tuma lugar cu un saco di sushi tira den area di Barcadera. Segun e compania, nan a wordo informa awe mainta cu saco di sushi a wordo encontra den area di Barcadera. Den e sushi tawata tin saconan cu ta sushi di un actividad deportivo cu a tuma lugar den fin di siman. Nan a splica cu como compania, nan a ser contrata pa hasi limpiesa despues di e actividad.
Prome embarcacion cu fruta di Venezuela a yega Aruba atrobe
BARCADERA – Manera cu Noticiacla a anticipa anteriormente, dialuna mainta dos barco di fruta procedente di Venezuela, esta Gaviota y El maracucho a trece hopi tonelada di fruta y otro mercancia pa Aruba pa consumo local. Contrario cu ora cu e prome embarcacion a yega Corsou luna pasa, unda cu tabatin yen di fanfaria y show cu gobernantenan local, gobernantenan di Aruba no a presenta na e waf na Barcadera y no tabatin pues un ceremonia elabora pa e yegada. Di otr banda, e barconan a wordo ricibi si pa un grupo contento di Venezolano residencia riba e isla, pa mustra nan alegria cu e frontera maritimo ta habri atrobe, aunke no manera antes. Pa loke ta esnan cu a trece e mercancia, nan a comunica cu nan tambe ta contento ya cu e ta nifica entrada pa nan tambe, y cu tin un lugar mas cu por abastece cu fruta, enbez cu esaki ta bay perdi. Esaki pasobra mientras cu tin suficiente pa Venezuela mes, ta keda hopi pa exporta aunke no tabatin forma pa haci esaki. Ta premira cu lo sigui ricibi mas barco asina den e periodo nos dilanti. E reglanan nobo ta stipula un control mucho mas rigido, pa asina evita cu cos por ‘sali for di man’. No ta conoci ki dia e frontera aereo lo habri, manera cu ta e caso cu Corsou. Pa loke ta e tarifa di benta, ta keda pa wak awor si en realidad e pueblo por ripara e diferencia. Potretnan ta cortesia di e portal NOTICIA IMPACTO.
DVG: Kico pa haci ora e posibilidad ta grandi cu nos por bay haya un horcan
Calor intenso y holor stinki di Dump y Ser’i Theisi a afecta barionan
ORANJESTAD - Durante e dia di diadomingo y diasabra Aruba henter a sinti e cayente di e calor intenso di mas di 32 grado Celsius y sin biento. Sinembargo pa e habitantenan di barionan di Mahuma, Buena Vista, Parkietenbos y Simeon Antonio mester a soporta mucho mas molester, fuera di e calor sofocante.
ELMAR: Corto circuito debi na heatwave a causa interupcion di coriente!
ORANJESTAD – E interupcion di coriente na San Nicolas diadomingo marduga tabata debi na e heat wave cu ta asotando Aruba y cu a causa un corto circuito riba e red di distribucion . Asina vocero di ELMAR, Audrey Croes a confirma diadomingo anochi. Segun Croes, ELMAR a experiencia un interupcion di coriente den un parti di San Nicolas y Savaneta diadomingo durante oranan di marduga pa motibo di un corto circuito den nos red di distribucion. Esaki a sosode durante e heat wave cu a causa un impacto grandi riba consumo di coriente, pasobra nos ta depende di coriente pa enfrenta e calor intensivo.
Follow NoticiaCla
