Minister: Mitar di placa di overtime cu gobierno a paga a bay pa polis!

ORANJESTAD – Mitar di e placa di overtime cu gobierno a paga na 2021 tabata na polis. Asina minister di Finanza Xiomara Maduro a bisa diahuebs mainta, den direccion di sindicato di polis SPA cu tabatin critica cu tin miedo cu polis lo no haya overtime paga debi na e areglo ‘nobo’ cu gobierno a introduci. E areglo ta bisa cu tur ambtenaar por traha maximo 40 ora pa luna na overtime y despues por haya time back. Maduro su intencion tabata pa mustra cu hasta den pandemia, overtime a wordo paga 100%, pues no ta compronde e argumento di e sindicato cu tin miedo di keda sin overtime.

CRITICA

E mandatario tambe a dirigi su mes na dirigentenan di e sindicato unda cu un di nan a sugeri cu porta polis tin cu tira atraco pa haya placa pa come, si cos sigui manera e ta. E mandatario a mustra cu cifra con KPA a haya casi 11 miyon di e 21 miyon cu a paga aña pasa. Y cu mayoria di e overtime ta bay pa e departamentonan di polis, KIA y Cuerpo Especial Arubano. Despues di KPA, esun cu mas ta haya overtime ta trahadonan di KIA (Prison) sgui pa CEA (Cuerpo Especial Arubano) (1.4 miyon na 2021) y GNC (Guarda Nos Costa) cu1.2 miyon na 2021. Ademas e mandatario a sigura cu pa tur e departamentonan en cuestion, tanto na 2019, 2020 y 2021 a paga overtime 100% tur ora. 

INVESTIGACION

E mandatario a mustra tambe cu ta haciendo investigacion pa wak con miho por structura e pago di overtime, pasobra a mira cu mientras cu overtime ta pasobra normalmente tin escases di persona, cu esaki no necesariamente ta e caso. E mandatario a mustra cu ta busca hende traha y ainda e overtime ta halto pues ta un otro motibo tin cu ta pagando e overtime. Ta pensa cu esaki por ta algo structural y cu pa esey mester wak con por haci pa e pago di overtime por ta miho pa evita dimas.