Servicio di emergencia cla pa Semana Santa

ORANJESTAD – Servicio di emergencia di hospital Horacio Oduber ta cla pa Semana Santa. E ta dilanti porta y durante e dianan aki, Departamento di Emergencia di Hospital ta bira mucho mas ocupa. Ta importante pa tene na cuenta cu Departamento di Emergencia (SEH) ta primordialmente pa casonan di emergencia.

CANTIDAD DI PASHENT

E cantidad di pashent durante Semana Santa ta mas halto cu normal. Door cu dokternan di cas no ta traha cu consulta riba dianan di fiesta pashentnan ta acudi na Departamento di Emergencia pa consulta cu un dokter. Consecuentemente, Hospital ta haya nan mes cu  pashentnan na e Departamento di Emergencia cu de facto no ta casonan urgente. Esaki ta causa tempo di espera largo pa e pashentnan, debi cu constantemente ta drenta pashentnan cu casonan mas urgente cu ta rekeri atencion medico mesora. Casonan cu Departamento di Emergencia ta atende hopi tur aña ta intoxicacion cu alcohol, maltrato y hendenan cu a intoxica cu cuminda.

KICO PA HACI

Si bo tin un caso cu ta rekeri atencion di un dokter di cas, manera entre otro dolor di garganta of di horea, por acudi na oficina di dokter na warda miho conoci como Huisartsenpost (HAP). Esaki ta situa banda di Policlinica Urologia. Durante fin di siman santo, esta diabierna te cu dialuna awo, e orarionan ta di 9'or di mainta te cu 1'or di merdia y di 6or di atardi te cu 9'or di anochi. Despues di e oranan aki, pashentnan lo wordo atendi pa e personal di Departamento di Emergencia, pero logicamente por encontra cu oranan di espera mas largo cu normal pasobra cu e personal ta atende casonan di emergencia y tambe pashentnan cu usualmente lo acudi na nan dokter di cas.

CARCHI AZV

Tur pashent mester presenta cu nan carchi di AZV y si esaki no ta e caso lo ta necesario pa paga den forma cash e servicionan ofreci. Aki tambe mester remarca cu e cuido mester ta di un nivel di urgencia y si no ta asina por fabor acudi cerca bo dokter di cas diamars 7 di april.

BISHITANTE DI LAMA

Hospital ta pone enfasis riba tur esunnan cu ta bay lama, pa tira un extra bista riba muchanan, no laga nan hopi ora den solo sin proteccion, pashentnan di epilepsia corda no bay lama bo so. Pa pashentnan diabetico, por fabor pone atencion na bo dieta, bo medicina(nan) y percura pa bebe suficiente awa.

Pa e pashentnan di dialisis ta pidi pa pone atencion riba nan dieta y specialmente consumo di likido. Mirando e calor cu ta haci banda di lama tin e tendencia di consumi mas likido cu ta prescribi pa nan dokter.

ALCOHOL

Y por fabor tur hende: bay poco poco cu alcohol y siguramente no stuur auto bao di influencia di alcohol. Historia a siña Hospital cu mayoria di su pashentnan den e fin di siman santo ta debi na abuso di alcohol, sea ta haya nan mes envolvi den accidente, sea ta haya nan mes envolvi den casonan di maltrato of ta bira malo debi na demasiado alcohol den curpa.