PWC: Aruba mester miho structura di maneho di stranheria

ORANJESTAD – Aruba mester yega na miho structura di maneho di stranheria. Esaki a e meta di un grupo di trabou yama 'Cooperacion Publico den Tereno di Siguridad y Inmigracion' cu tin cu logra esaki via un asina yama ‘Ketensamenwerking’. E grupo aki a reuni diaranson pa prome biaha y ta consisti di tur e departamentonan involucra. Trata aki di Ministerionan di Asuntonan General, Integracion, Husticia, Cuerpo Policial Aruba, Departamento di Relacionnan Exterior, Ministerio Publico, Departamento di Integracion y Maneho di Admision di Stranhero, Veiligheidsdienst Aruba, Instituto di Alarma y Siguridad Aruba, entre otro. Un rapport cu a wordo traha pa Price Waterhouse Coopers, riba e maneho actual di e maneho di stranheria, a presenta varios punto riba cual tin cu mehora ariba, y cu tin cu bay drecha awo. NoticiaCla.Com sinembargo no a haya tende kico e puntonan aki ta. 

REUNION

Diaranson merdia, pa prome biaha tur e partidonan a reuni na sede di PriceWaterhouseCoopers na Oranjestad. Minister Sevinger a splica cu tur esaki ta forma parti di un acuerdo cu a keda cera desde 2006 cu Hulanda. Lamentablemente e dia di vencemento di e acuerdo a yega na 2010 sin cu nada a wordo haci y pesey gobierno a pidi pa haci un renobacion di e acuerdo.

STRUCTURA DI MANEHO

Teniendo na cuento e aspecto di vergrijzing cu nos isla ta pasa aden ademas di e cantidad grandi di hobennan cu ta busca estudio di nivel halto na exterior, nos pais no tin e forsa laboral necesario pa cumpli cu e demanda di e sector horeca. Ey ta caminda cu for di 1985 ta ricibiendo un fluho di trahadonan stranhero cu ademas di traha, a forma un bida riba nos isla y ta busca reencuentro cu su famia, esta casa y yiunan. Mirando e situacion aki, ta sumamente importante pa Aruba tin un structura di maneho adecua cu ta cumpli cu derecho, pero tambe ta salvaguardia nos pais. Esey ta e tarea cu e grupo di trabou aki tin y cual ta spera cu pronto lo bin dilanti cu resultadonan cu ta mehora e condicionnan pa tur partido.