NHC ta vigilando ola tropical cu potencial pa desaroyo, pa drenta Caribe

MIAMI – National Hurricane Center na Miami ta vigilando un sistema tropical, cu aworaki ta un ola tropical den desaroyo algun 100 miya sur di Isla Riba. E ta produciendo un area di yobida desorganisa, mientras cu e ta move direccion west cu forza di 29 miya pa ora. Ta pronostica cu den 5 dia e por desaroya den algo mas fuerte, drentando Caribe. Ya caba meteorologonan na Miami ta haci mencion pa islanan ABC tene bista riba e sistema aki. Si e sistema aki desaroya den un tormenta, e por haya e nomber di Gaston of Hermine.

KIBRA

Ta conoci cu ora cu tipo di sistemanan asina desorganisa drenta Caribe, e chens ta grandi cu e ta kibra y of move. Por corda con e ola tropical cu despues a bira tormenta Bonnie, a hala atencion pero finalmente no a haci nada serio pa nos isla. No mester descarta cu cada sistema ta diferente y cu contrario na e tempo cu Bonnie tabatey, e situacion di tempo tabata menos faborabel.  Aworaki ta duna e sistema actual 50% chens di formacion den 5 dia di tempo. Esey ta pone cu pa diabierna e mester ta den nos area si e keda na bida.