Aki dos siman renobacion y expande Colegio San Antonio ta cuminsa

ORANJESTAD - Despues di basta tardansa, awe porfin e proyecto di renobacion y expansion di Colegio San Antonio na Sta. Cruz ta completamente aproba. E proyecto a conoce un tardansa, y ta for di e tempo cu e mandatario actual, Minister Michelle Hooyboer – Winklaar, a tuma Enseñansa na su encargo, e proyecto aki tabata den proceso di preparacion.

COSTO DI PROYECTO

Ta trata di un proyecto di mas di 11 miyon florin, y mirando e suma halto aki, a opta pa sinta cu tur stakeholders un biaha mas na mesa pa asina sigura si en berdad tur loke tin riba papel ta berdaderamente necesario. Esaki a tuma luga, na varios ocasion y hunto cu cabesante y tur demas partido a yega na e concepto final pa e scol y a reduci e costo cu 4 miyon. E motibo tras di e ehercicio aki, cu a tuma su tempo, a conduci cu por aloca fondonan awor pa drecha un otro scol cu tambe tin mester di renobacion. Unicamente door di haci tipo di ehercicio nan asina, por yega na aloca fondonan necesario pa por drecha mas scol.

FIRMA DOCUMENTONAN

E siman aki mes lo caba di firma tur documento necesario. Mientras cu ta premira e inicio di trabaonan pa e di 2 siman di April 2015. E compania cu a gana e destaho publico ta Bohama cual tin sigur un tarea basta extenso, ya cu aki ta trata di un proyecto bastante grandi.

DETAYE DI RENOBACION

No solamente ta papia di renobacion di e edificio existente pero tambe di expansion di mas lokaal y kantoor. Tambe e scol lo ricibi un gymzaal completamente nobo. Na e entrada principal lo bin un edificio di 2 piso cual ta principalmente kantoor pa e team cu ta maneha e scol aki cu ta conta cu mas di 500 studiante. Tambe a sigura cu lo bin un bon cantina y zitplek pa e studiantenan. Parkeerplaats pa bishitante y docente, asfaltering di e tereno completo y un cura pa por sigura siguridad pa tur esunnan cu ta bishita e scol aki tambe a ser inclui den e proyecto.