Diabierna sindicato ta haya clarificacion riba situacion ‘nobo’ di overtime pa polis

ORANJESTAD – Pa diabierna awor sindicato di polis SPA ta haya mas claridad di minister di husticia Rocco Tjon, riba e asunto ‘nobo’ di overtime. Siman pasa gobierno a anuncia un cambio temporal di maneho di overtime unda cu ambtenaar por yega te 40 ora maximo di overtime pa luna y despues ta pasa pa time back. Polis tin problema cu esaki debi na onderbezetting caba. E minister a reuni cu e sindicato awe, y a bisa cu pa diabierna awor, minister lo contesta preguntanan cu a keda haci na dje. 

POLIS NO TA FORMA PARTI DI E AREGLO NOBO?

Mientrastanto for di diabierna, NoticiaCla a compronde cu polisnan lo a haya confirmacion for di e.o. e korpschef nobo Arnhem, cu polis no ta cay bou di e areglo aki y cu pa nan, lo tin un otro situacion. E portal aki a acerca e mandatario riba e tema y a haci e pregunta specifico:” Polisnan ta cay bou di e areglo aki tambe, si of no”. E mandatario no a contesta e pregunta directo, pero a bisa e portal lo siguiente:” Den Justitieel Veiligheidsberaad nos a traha un Nota y haci palabracionnan con por baha y maneha overtime na un manera responsabel. Esaki a wordo comunica tambe na vakbonden”. Segun e mandatario a sigui bisa, esaki tabata pa tene cuenta cu aspectonan di seguridad pa nos comunidad y tambe e trahadornan mes. “Awe mi a reuni cu SPA y nan a hacimi algun pregunta al respecto y lo mi comunica bek na nan prome cu diabierna” e mandatario a sigui bisa. Ora cu e portal aki a keda insisti si esey kier men cu e ta ‘desvia’ di e regla aki pa polis, e mandatario a bisa e ora cu nan no a ‘kwantificeer e na ora vooralsnog’. “Tur stakeholders ta di acuerdo cu e por baha, pero mester tene cuenta cu aspectonan di seguridad. Vooral pa nos agentanan policial uniforma, internationale verplichtingen pa loke ta bezetting, afspraken pa loke ta minimumsterkte pa por grantiza segurdiad externo y interno” e mandatario a finalisa bisando. Diabierna pues, ta spera di haya mas clarificacion riba e punto aki.