Directiva nobo di Colegio EPI introduci na personal

ORANJESTAD - cu representantenan di tur unidad y departamento a bini hunto pa cera conoci cu e director nobo, Martin Richardson, den auditorio di Colegio E.P.I,. A nombr’e como Algemeen Directeur, mientras cu a nombra Angelique (Ankie) Danker como Directeur Bedrijfsvoering. Ambos miembro nobo di directiva tin experencia amplio den posicionnan di maneho y coordinacion den enseñansa y den sector priva. Minister Michelle Hooyboer-Winklaar tabata presente y asina mustra su aprobacion pa cu e directiva nobo, personalmente. “Nos tin retonan nos dilanti pero e confianza t’ey y nos lo haci di E.P.I. un scol cu lo sa di brinda e miho educacion pa nos comunidad”, asina Minister Michelle Hooyboer-Winklaar a bisa esunnan presente. “Nos ta concentra awor pa caba aña escolar 2015 cu hopi exito y mientras cu nos ta haci esaki ta combersa cu nos hendenan pa mira na unda nos ta ahusta programanan”, Angelique Danker, Directeur a bisa. . “E.P.I mester di diferente facelift y esun di mas grandi sigur lo ta e introduccion di Beroepsgerichte Kwalificatiestructuur BKS”. Pa loke ta e director nobo, Richardson, e la mustra cu “Nos mester comprende cu nos studiantenan ta riba un nivel masha halto y pa yega na nan nos mester profesionalisa desaroyo di nos docentenan y cambia structura pa nos keda na mesun nivel”.

COLEGIO EPI

Colegio E.P.I ta boga pa forma profesionalismo y personalidad y ta kere den honestidad, confianza, disciplina, motivacion y responsabilidad. Nan ta conta cu un total di 136 docente y 53 personal di sosten y 1700 alumno reparti den 4 unidad. E ultimo director tabata Undina Harms cu a retira recientemente.