Orden di Abogado ta ‘sugeri’ pa bin cu ‘codigo pa periodismo’ na Aruba

ORANJESTAD – E orden di abogado (OvA) di Aruba, cu ta e ‘organo’ cu ta e.o. salvaguardia e derecho y alavez atende cu e ‘comportacion’ di abogadonan na Aruba, a ‘sugeri’ diabierna di un manera fini pa,- mescos cu a haci cu nan profesion -, establece un codigo di periodismo na Aruba. E orden no ta bisa specificamente a base di kico nan ta ‘sugeri’ e codigo aki pero mas bien ta ‘insinua’ cierto practica actual cu por bira problematico si no tin e tipo di codigo aki. 

OBSERVACION Y INTERPRETACION

E Orden ta sigui mustra riba e desaroyo na Aruba di ‘periodismo tradicional’ pa ‘periodismo moderno’, unda cu e ta referi mas bien na e forma di cierto medio di bay ‘live’ cu material visual, cu e chens cu e por ‘interferi’ den e bida priva di un ciudadano sin cu esaki ta permisibel. Segun e orden, creando e ‘codigo’ aki, por percura pa cierto posibel practica incorecto keda evita y cu e por desaroya den un caso legal entre e medio y esnan afecta. ‘Cu un codigo, e ta duna tur hende ‘mas grip’, refiriendo porta na ‘mas control’ riba loke ta wordo publica. 

KICO TA NOTICIA

E orden ta sigui ‘splica’ kico segun nan, ta cay bou di noticia y kico no, y cu prensa (na Aruba) mester tene cuenta cu no por desvia di e meta di un periodista, ora cu ta raporta y cu por viola e derecho di un persona. Ta trata tambe e forma awendia di bay ‘live’ cu ta pone cu e noticia ta yega mas liher pero tambe mas leu cu tur su consecuencia. Ta mustra cu e periodista mester tene semper na cuenta e interes di e partidonan en cuestion ora cu  haci e raportahe. Lesa e carta completo original di e orden di abogado AKI.