Compania priva ta alivia polis pa documenta accidente di trafico

ORANJESTAD – Mirando cu gobierno a drenta un acuerdo di trabou cu e compania priva Forensys , -expertonan di accidente y incidentenan di trafico-, ta libera polis di un trabou extra ora di registra accidente. Los di e parti di registra e accidente oficialmente, e parti cu ta ensera documentacion pa e.o. seguro, lo ta den man di e compania Forensys, cu ta pone cu polis tin mas tempo pa haci otro trabou manera patruya. E experticio y forma di traha, segun minister di husticia Arthur Dowers, ta pone cu nan ta bay ta trahando den forma estrecho cu Cuerpo Policial di Aruba, brindando nan tur e datonan necesario cu wordo compila na cualkier sitio di accidente of incidente. “Cuerpo Policial ta haya e cooperacion di Forensys di tal importancia cu nos ta bisa cu nos mester sostene e trabou cu boso ta haci,” e mandatario a bisa. E compania ta existi pa mas di 18 aña, y ta opera riba varios isla den Caribe, fuera di Aruba. Minister Dowers e atardi aki a haci entrega di e certificado cu a wordo entrega na e personal di Forensys despues cu nan a ricibi e entrenamento necesario for di Cuerpo Policial di Aruba.