Minister: Aruba Fair Trade Authority (AFTA) ta percura pa competencia husto y liber

ORANJESTAD – Despues cu e minister di Economia Geoffrey Wever a firma e plan di ehecucion na fin di maart ultimo, diahuebs mainta e mandatario a anuncia oficialmente e creacion y implementacion di e entidad huridico Aruba Fair Trade Authority (AFTA). Esaki ta pa percura pa crea un nivel di competencia liber y husto. E ta forma parti di e asina yama landspakket, y por a haya fiansa via COHO. E gastonan di e creacion y iplementacion ta aparece den presupuesto 2023 di Aruba. Den e plan, a emplea un experto riba e tereno, Albert Scholten, cu dos ambtenaar mas cu lo ehecuta e trayecto di implementacion y comunicacion. Un di e metanan principal tambe, ta pa combati pobresa, door di tin un situacion husto y controlabel di productonan riba mercado, y tambe ta frena e inflacion di e isla. Tur hende, consumidor, comercio y tur otro hende lo beneficia di esaki segun Scholten, durante su presentacion. A menciona e suma di 620 mil florin pa cual a pidi pa COHO financia esaki. E gastonan structural ta bay den e presupuesto di pais Aruba. Nota: E potret ta di minister Wever ora cu e la firma pa e lantamento di AFTA na maart ultimo.