Cornelie: Maestronan ta rabia y kier mas accion

ORANJESTAD – E prome dia di accion di maestronan na Aruba ayera a bay hopi bon. Esaki ta e reaccion di e secretario di e sindicato di maestro SIMAR, esta Maroeshka Cornelie. Segun Cornelie tabatin ‘ hopi sugerencia pa mas accion. Maestronan y docentenan ta rabia y ta kere den mas accion pa demostra nan mal contento’. Ademas e ta sigura cu tin mas plannan na caminda pa mas tipo di accion.

KICO SINDICATO KIER

Loke cu Cornelie a subraya tambe ta cu den pasado ,e sindicato a yega di entrega un manifiesto na minister Dowers caba, pa cu seguridad di e maestro. “Nos lo bay repas’e y ahuste y lo bay entreg’e na minister Hooyboer. Loke cu e sindicato kier logra cu e tipo di accionan aki, ta ‘cambio de comportacion di mayor y alumno en general, den mentalidad, den trato den tur aspecto, y e switch den e respet y balor cu tin pa e trabou di e maestro.

VACANTIE

Awor lo tin un periodo di vacantie, unda cu e maestronan lo analisa e situacion y resultado di e accion inicial, y despues sigui riba nan planificacion. Segun Cornelie, loke a resalta atrobe, ta cu e maestronan ta rabia y riba esey tin cu bay actua.