Lider di MEP lo entrega keho contra parlamentario di AVP

ORANJESTAD - Lider di MEP señora Evelyn Wever-Croes, for di Cede di MEP a informa cu e lo entrega un keho contra parlamentario Benny Sevinger pasobra Sevinger ta sushando su nomber.  E lider di e partido heel a mustra cu recientemente Parlamentario Benny Sevinger a expresa cu el a entrega keho contra dje bisando cu hasta el a bay Ministerio Publico bek pa wak con ta para cu e keho. 

Wever a remarca, cu e tambe a busca informacion y ta pendiente si di berdad Sevinger a entrega keho si of no. Segun Benny Sevinger, awor cu e ta meti den tanto problema legal y penal, el a entrega un keho contra Lider di MEP pasobra na aña 2004, 18 aña pasa, Lider di MEP lo a haci cosnan cu tereno y lo a gana Awg 17.5 miyon. 

“Esaki ta un mentira ya cu na 2004 mi tabata traha den sector priva como un abogado y consehero fiscal. Mi no tabata Minister di infrastructura, mi no tabata encarga cu tereno, mi no a bende ningun tereno. E unico tereno cu mi a yega di adkiri te esun cu mi cas ta construi riba dje cu te awe mi ta pagando hypotheek riba dje”, Wever a bisa.  

Wever-Croes a expresa cu e mentira aki di Benny Sevinger ta un mentira cu tur hende por realisa cu hende cu ta den desesperacion manera cu Sevinger ta aworaki, ta lansa e tipo di mentiranan. 

“Awor si e no a entrega keho, mi lo entrega keho contra dje toch pasobra e ta susha mi nomber. Mi no por permiti cu e ta susha mi nomber cu cosnan cu no ta berdad” Weever a sigui bisa. “ Mi kier sigura comunidad di Aruba, laga su expresionnan manera nan ta, manera ta bisa na Hulandes, ‘een kat in het nauw maakt rare sprongen”.