Partido politico nobo ta nace oficialmente otro siman

ORANJESTAD – Aruba lo conoce un partido politico nobo dentro di poco. E partido ta uno cu tin basta dia den tapara, y tin intencion di profila su mes al estilo di e partido Alianza, cu no a conoce un bida largo. E nomber tentativo, ta Partido Progresista Feliz, cu ta basa su mes riba entre otro cierto aspecto cu tin cu percura pa nos isla na final di dia, tin un calidad di bida cu ta hacie feliz. Nan meta lo ta pa boga entre otro servicionan gratis, pa enseñansa, salud y tambe otro tipo di servicio.

PUNTO DI BISTA

E partido ta sali di punto di bista cu mester aloca fondonan di un forma mas practico, envez di busca voto popular pa medio di presenta proyectonan cu no ta yuda calidad di bida. Nan ta sali di punto di bista cu nan a analisa varios gobierno di pasado, y tur ta basa nan mes riba e politica bieu, y cu esaki tin cu cambia. Mucho mas nan no kier a divulga, te ora cu nan tene nan conferencia di prensa aki un siman. Eynan nan lo revela nan logo tambe, y nan puntonan mas fiho.

MIEMBRONAN DI PARTIDO

E prome 10 miembronan cu nan a logra recluta den un periodo di algun luna, tambe lo keda presenta durante e conferencia ey. Ta trata di hendenan cu sea a forma parti di un partido, pero cu no mester di esaki mas, esta no ta drenta pa motibo pa enrikece nan mes. Manera cu tabata e caso di e partido Alianza, tin varios ‘power people’ den e partido, y cu ta cubri un cantidad di area di experticio, for di comercio, laboral, educacional y tambe hudicial.