Dia ta sera sin cu gobernador a firma presupuesto

ORANJESTAD – Dialuna a sera sin cu gobernador di Aruba a firma e presupuesto. NoticiaCla a compronde cu esey tin di haber cu e hecho cu gobernador no a ricibi e contesta di gobierno ainda riba e quick scan. Unabes cu e ricibi esey, e por dicidi si e por haya su mes cu e contesta y pasa pa firma e presupuesto. E pregunta ta, kico exactamente e lo anjadi na e condicionan, con e lo por haci esaki, y si gobierno ta inclina pa sigui e consehonan.

Atardi, tabata obvio cu ainda gobierno no a fialisa e carta, ora cu nan manda nan comunicado cu e titular ““Gobierno ta finalisando carta di contesta riba ‘tussenrapport’ pa Gobernador”. Y den e comunicado, ta papia di cu denter di poco Prome Minister Eman lo entrega e carta.

Den un conferencia di prensa dialuna atardi, minister saliente Juan David Yrausquin a sigura prensa cu lo tin un copia pa prensa ora cu ta asina lew, unda cu por mira e contenido di e carta cu wordo manda pa gobernador Tambe e mandatario a bisa cu e publicacion di e "tussenrapport" aki Gobernador no tin motibo pa no firma e presupuesto 2014. "Hasta ta enfoca riba e presupuesto di 2015. Como tal presupuesto 2014 por wordo fiha mas lihe posibel.".

Manera cos ta mustra, NoticiaCla a compronde cu pa diamars mas probable, tur hende lo haya sa si gobernador a firma, y si e la firma dialuna mes of si e la warda e contesta di gobierno anochi, pa e firma e presupuesto ainda diamars.