Aruba ta conoce su canal nobo di television

ORANJESTAD – E tabata parse un idea riba papel, pero porfin despues di un tempo relativamente corto, un compania relativamente nobo, a logra pa lansa un canal di television netamente politico, esta politica-tv.  Contrario na e concepto normal di television, e programacion lo ta dedica solamente cu metanan politico. For di e acostumbrado talkshow nan politico, debate, lo ofrece orario na partidonan politico cu por cumpra e ora y presenta nan programanan a base semanal of mensual. Ta haciendo intento pa logra transmiti reunionnan publico di e.o. parlamento di Aruba. Y interesante ta cu un persona hopi conoci den mundo di television, cu recientemente ainda tabata na television, ta involucra cu e canal aki. E compania lo opera riba canal 48 di e red di CableTV, y ta inclui den e programa basico di cable. 

CONCEPTO

E concepto y studio lo ta uno hopi simpel pero moderno, haciendo uso di e formato di television simpel pero practico actual cu tin riba e tereno aki. Actualmente ta den proceso pa recluta personal pa e canal, y por bisa cu tin varios personalidad nan conoci den comunidad cu ta haciendo e preparacion necesario pa por lansa nan mes riba e pantaya chikito. Aworaki tin un grupo di persona entrenando e personal tecnico, pa despues laga nan encarga cu e canal completo. E proceso di reclutamento lo cuminsa dentro di poco, ora cu avisonan cuminsa sali den medionan di comunicacion. Actualmente e compania, tin tres persona recluta localmente cu ta ocupa cu e operacion y e proceso di lansamento.

LANSAMENTO

Mientras cu nan documentacion ta completamente cla, e fecha di lansamento no ta conoci ainda. NoticiaCla.com a compronde sinembargo cu e intencion ta pa, cu permiso di parlamento, haci un transmision di prueba awe mainta caba cuminsando cu e transmision di prueba na parlamento. Lo cuminsa cu transmision di e reunion di parlamento awe mainta 10’or. Aunke no tabata facil, a logra haya aprobacion di parlamento pa por transmiti e reunion e reunion aki.

PROGRAMACION

A compronde cu lo pasa den e periodo di prueba cuminsando cu e transmision di awe mainta, sigui pa algun programa pregraba, den cual ta splica e.o. e proceso electoral, historia politico di Aruba, y algun otro aspecto cu a keda prepara durante e ultimo lunanan. E director di e canal ta un persona hopi conoci den mundo di television, y cu recientemente ainda tabata na un canal local. Fuera di e persona aki, tin algun ‘heavyweights’ politico, vincula cu e proyecto aki, cu ta priminti di bira algo bastante ambicioso.