CAFt ta mustra cu segun e najaarsnota ainda Aruba no a haci suficiente pa cumpli!

ORANJESTAD – E colegio di supervision financiero pa Aruba CAFt no ta convenci cu e najaarsnota entrega fin di luna pasa y tampoco e di dos raportahe financiero di Gobierno di Aruba (GOA). E Najaars Nota ta un raportahe cu ta mustra un resumen provisional di e presupuesto di e aña en cuestion, esta 2022. E siman aki e colegio a duna su reaccion di e di dos raportahe financiero y un reaccion parcial di e najaarsnota. For di e reaccion di e colegio, ta compronde cu Aruba toch no a haci suficiente pa ‘drecha’ e situacion pa evita un aanwijzing. Mester bisa mes momento si, cu e decision awor ta completamente den man di RMR pa dicidi riba esaki, ya cu asina cu CAFt entrega su conseho, su trabou ta haci. 

ARUBA TA SIGUI INCUMPLI

For di e ultimo reaccion, CAFt ta bisa cu ‘a base di e di dos Raportahe di Ehecucion (Uitvoerings Rapportage) (cu por cierto a wordo entrega laat tambe!:red) y e Najaars Nota, CAFt ta constata cu su recomendacionan pa e presupuesto (2022:red) a wordo implementa di forma limita’. Esaki ta nifica pues cu nan (CAft) no ta contento cu e loke ta mira. 

SERLIMAR COMO EHEMPEL

Como ehempel, CAFt ta usa Serlimar su situacion. Den e recomendacionan anterior, ta pidi pa saca e 3 miyon di ayudo pa Serlimar for di e presupuesto. Pero atrobe, GOA no a duna e oido aki. “For di e UR y NJN, no ta mira mas ahustacion di e problemanan na Serlimar y e suma extra di 3 miyon na Serlimar ta keda asina den e presupuesto di e pais”, e carta ta sigui bisa. Algo cu nan a bisa hopi cla cu nan kier pa GOA coregi. 

MEDIDA STRUCTURAL TA KEDA AUSENTE

Tambe CAFt ta haci mencion di e hecho cu medidanan structural pa cu e proximo añanan a keda afo. “Esey por nifica cu e debe di pais Aruba lo aumenta innecesariamente. Por cierto, Aruba lo tin cu cuminsa presta placa riba mercado local” CAFt ta sigui bisa, y esaki lo aumenta e debe di interes mas pa Aruba. Por lesa e carta ultimo di CAFt AKI.