Hues: Comerciante Harms lo por a sponsor Sevinger a cambio di tereno

ORANJESTAD – Awe diaranson mainta ora cu e caso penal Avestruz a inicia cu sospechoso principal parlamentario Benny Sevinger riba e asunto di supuesto otorgamento illegal di tereno di gobierno, e prome sospechoso cu a wordo scucha tabata conocido comerciante C. Harms (67), sospecha di soborno activo di Sevinger cu e tempo ey (2012) tabata minister di infrastructura. E session di awe tabata pa hues interoga e sospechoso y  haya sa di su banda kico ta kico. 

SOSPECHOSO HARMS

Hues a establece cu Harms tabatin varios negoshi di cual 3 particularmente e tabata maneha y unda cu tabatin un relacion comercial cu Sevinger e tempo ey cu Sevinger tabata minister di infrastructura. Loke hues a purba saca afo ta pa clarifica e relacion financiero, ya cu segun acusacion di Ministerio Publico, ta acusa Harms di a paga Sevinger a cambio di fabor politico (tereno). Algun dato cu hues a confronta Harms cu ne, tabata pa establece cu Harms a purba influencia Sevinger door di paga sumanan di placa, y ricibi un fabor bek’.Y manera cu hues a bisa, e fechanan y e forma con esaki a tuma lugar, por pone hende pensa esaki. 

SPLICACION

Harms a sigui pa confirma na hues cu enberdad e tin un relacion cu Sevinger, inicialmente via su socio di Sevinger su negoshi di architecto. Y despues ora cu,- Harms ta sigui bisa -, Harms a mira loke cu Sevinger tabata haci como minister di infrastructura den e prome gabinete Mike Eman I, e la keda impresiona. Ora cu a bin e di dos termino, Harms a responde positivo riba peticion di e grupo di Sevinger pa donacion pa campaña. Harms a confirma na hues cu e tabatin un presupuesto pa campaña di 100 mil florin, pero a surpasa esaki tambe. Ora cu hues a puntra si e tabata patrocina tur partido politico, a keda confirma cu e tabata practicamente exclusivamente pa sostene e partido berde, mirando e simpatia cu e tabatin pa Sevinger y Eman. Hues a cuestiona e fechanan di pago di contribucion, particularmente un di nan cu tabata despues di e eleccion y unda cu Sevinger a sinta caba como minister bek. Pero Harms, a duna splicacion cu Sevinger tabatin mester di mas placa debi cu a keda debe y aki ta unda cu a paga Sevinger e suma extra. Harms a mustra cu e comunicacion den su compania no tabata esun miho y hopi biaha tabata pasa cosnan cu e no tabata sa pero cu tabata ok, y cu tabatin un relacion comercial cu por lo menos 2 di su yiunan tambe. 

RELACION CU BENNY

Ora cu hues a confronta Sevinger riba esaki, Sevinger a conta un storia poco diferente di Harms, unda cu e si a bisa di ta considera Harms como un bon amigo di hopi aña for di tempo cu e tabata pinta mapa pa Harms etc mas of menos 20 aña pasa. Den e caso specifico, Sevinger a splica hues cu a acerca Harms ora cu e tabata minister, pa Harms desaroya algun proyecto pa e gabinete, entre nan un hotel den caya grandi na Playa. “Nos a pusha nan fuertemente” Sevinger a sigui bisa. Di e tereno y proyecto ey, e ta confirma cu e la pidi ayudo, pero no ta corda otro terenonan cu e ta wordo confronta cu ne. Lamentablemente nada di e plan di hotel di caya grandi a materialisa, segun Sevinger. 

FIRMA  FACIL

Loke por hinca Harms y Sevinger den problema segun hues, ta e forma facil cu nan tabata anda pa loke ta peticion y aprobacion di tereno erfpacht y of e opcion. Aki Harms a confirma cu e tabata practicamente ‘kind aan huis’ na Bestuurskantoor y tabata topa e ministernan Eman y Sevinger hopi eyden. Ta aki Harms a puntra Benny pa un pida tereno dilanti di Divi Phoenix pa desaroya den un proyecto Islands Estates. Pues e ta confirma na hues cu e no a bay via DIP, sino directamente a puntra Sevinger pa esaki. Un practica cu segun Sevinger ta sigui splica hues, no tabata incomun. Pero, mes momento e ta bisa cu mientras cu e no tin obhecion, e tabata manda e persona si pa sigui handle cu DIP y si nan duna ok, e ora e proyecto tabata pasa. Aki abogado di Sevinger, David Kock a cay aden pa splica cu e proceso cu hues tabata cuestiona, ta un practica comun, segun declaracion di propio director di DIP sr Croes, cu a splica cu ta ricibi peticion di tereno via minister, via DIP y via BID. Pues de facto, no tabatin nada robez cu esaki. Ora cu hues a caba cu e interogacion di Harms, a cera e parti aki y a mustra cu na November Ministerio Publico lo presenta su rekisitorio contra Harms, pa despues na December abogadonan presenta nan defensa.