Minister ta sugeri pa Hulanda paga mitar di debe di Aruba (Covid19) pa por cumpli cu norma di CAFt

ORANJESTAD – Gobierno di Aruba a sugeri pa Hulanda paga mitar di e debe di 916 miyon cu Aruba tin debi na e pandemia. Asina e minister di finanza Xiomara Maduro ta pone den e asina yama ‘Memorie van Toelichting’ (MvT) di e concepto di presupuesto 2023. Segun gobierno, esaki lo ta e unico forma cu Aruba por cumpli cu e ratio di endeudamento di 50% na 2040 y esun di 70% na 2027 conforme e norma den e protocol di LAFt. “Di otro forma e ora mester revisa e norma di 1% surplus y e ratio n di endeudamento di 70% y 50%” gobierno ta sigui bisa den e MvT. 

RECOMENDACIONAN DI CAFt

Den e ultimo carta di CAFt pa gobierno, e colegio a presenta 9 recomendacionan pa tene cuenta cu ne den e presupuesto. Manera cu e mandatario di Finanza a bisa recientemente, den e MvT a contesta CAFt exactamente con lo atende cu e puntonan aki. For di e mesun MvT ta compronde cu ta solamente un lo no por cumpli cu ne, y e otronan lo wordo adapta na caminda. Como motibo di e ‘incumplimento’, e mandatario di finanza ta splica cu door cu mester a presenta e presupuesto na tempo, hopi departamento mes no tabatin nan presupuesto cla, pues tabata falta informacion. Awor cu esaki ta cla, lo adapta e presupuesto y inclui e informacion cu falta. 

NO POR CUMPLI

E unico cu a bisa cu awor mesora no por cumpi cu ne ta e ahustacion di e goederen en diensten y baha esaki na e nivel di pre corona y pa usa esaki como punto di referencia pa un coreccion di prijs pa 2023. Y como motibo duna pa no por cumpli, ta menciona entre otro obligacionan contractual, aumento di prijs y ehecucion di e landspakket. 

CAFT TA DI ACUERDO?

E pregunta ta si CAFt ta bay di acuerdo cu tur e argumentonan usa di gobierno, pasobra practicamente cumplimento di tur 9 recomendacion ta basa riba promesa cu ‘lo bay adapta’ y ‘lo bay inclui na caminda’, pues tin cu wak ainda si gobierno ta logra cumpli cu su palabra den e caso aki. Por lesa e MvT AKI.