Parlamento pa trata topiconan problematico di enseñansa mayan

ORANJESTAD – Parlamento den un reunion publico mayan mainta (lesa e oproep aki) lo trata dos topico cu ta actual, esta e problema di maestra suspendi di e scol na Kudawecha, y e asunto di school geld di SKOA. E reunion, -pidi pa fraccion di MEP-, a keda otorga y ta tuma lugar 10’or durante cual e fraccion di MEP kier cierto clarificacion di e dos topiconan. Di parti di e minister encarga, Michelle Hooyboer, e la bisa NoticiaCla.com awe cu no tin cu spera mucho cos nobo di loke ta eifo caba. Pues tin cu wak realmente cuanto cos por sali for di e reunion ey.

INFORMACION LIMITA

E mandatario di enseñansa a bira NoticiaCla.com cu ‘mirando cu esaki ta un reunion publico, y cu ainda investigacion ta andando, no por comparti hopi informacion riba detayes’. Como tal e mandatario ta anticipa cu hopi cos ‘nobo’ lo no por bin dilanti of keda presenta. Esaki sinembargo no ta para e fraccion di MEP, ni su lider Evelyn Wever Croes, cu a sigura NoticiaCla.com cu e ta determina pa saca mas hopi informacion afo. Entre e puntonan cu Wever kier, ta pa ‘papia di SKOA met name/y di Kudawecha cu e ta zorg pa oplossing y no pa mas problema’.

COLEGIO TOETS

Segun fraccion di MEP, e klas en cuestion na Kudawecha, mester haci un colegio toets (prueba pa por drenta Colegio Arubano) y segun Wever, e preparacion ‘no ta bayendo bon’. “Y si nan no haal e toets, nan no por ‘re-do’.

PREGUNTA DI PARLAMENTO Fuera di esey, tin e pregunta cu Parlamento tin cu contesta, cu ta si e minister ‘tin loke mester pa soluciona tur e problemanan den su ministerio, pasobra ta parse cu su ministerio ta na ‘candela’. “E minister tin solucion, e tin alternativa?” Wever ta puntra. Y si e no tin esey, e pregunta ta, si e por sigui carga sosten di parlamento como minister, of si e mester ‘tene honor na su mes y entrega su retiro’. NOTA. E foto ta di archivo di dialuna ora cu un grupo di alumno di Scol Preparatorio Kudawecha a bay protesta na Parlamento.