Hues a autorisa pa transmiti video y audio limita di e caso Avestruz pa publico

ORANJESTAD – Hues a bay di acuerdo, pa prome biaha, pa transmiti tanto video y audio limita durante tratamento di e caso penal Avestruz. Esaki den cuadro di ‘openbaarheid’ osea transparencia di e caso. Specificamente, lo permiti imagen di video di e apertura di e caso unda cu solamente e hues y griffier lo bin den pantaya, y na final di e caso, ora cu lesa e sentencia. Pa loke ta audio (voz), hues a autorisa pa permiti transmission di e audio ora di e rekistorio di e fiscalnan y e defensa di e abogadonan di e respectivo sospechosonan. E peticion a bin di parti di cierto medionan local y dialuna huez a dicidi riba e tema aki. 

OBHECION

Inicialmente fiscal tabata di acuerdo pa solamente transmiti e audio di e rekisitorio, pero aki abogadonan a protesta y a mustra cu no por ta asina cu ta presenta esey so, pues cu e pueblo ta haya un banda di medaya cu ta keda graba pa semper, y usa como kier, sin cu defensa ta haya nan oportunidad. Como tal a exigi e ora pa nan tambe por presenta nan banda pa tur hende tende. Y esaki a keda aproba. Ta limita esaki si na solamente e parti di e defensa y no ora cu tin cu trata e parti ‘personal’ di cada sospechoso, cu ta bin na final. No ta conoci si e video y audio lo ta cla caba pa cuminsa for di diaranson awor caba. 

CORSOU

Mester bisa cu na Corsou esaki ta un practica di hopi tempo caba, unda cu huez ta transmiti e apertura y e sentencia di e caso y tin biaha te hasta mas. Y periodistanan por retransmiti nan comentario durante e caso mes caba. Aki ainda por solamente e ultimo, pero pa cada caso specifico. Pues, Corsou tabatin un   adelanto riba esaki.