Paul Croes: Awe lo dicidi si ta apela sentencia contra SDP

ORANJESTAD – Awe den curso di dia, minister Paul Croes lo mester a dicidi si e ta ‘apela’ e veredicto di corte di ayera contra e matutino Solo di Pueblo. E la splica NoticiaCla.com awe mainta cu ora cu e reuni cu su abogadonan e ora, e decision ta cay. Aunke mes momento e la bisa tambe cu ‘apela un sentencia ta ora cu bo perde un caso’. Algo cu e mandatario no ta considera cu a sosode. Y mirando e interpretacion publico, tur dos partido ta argumenta cu nan a gana e caso y cu ‘consecuentemente e otro a perde’. E realidad ta cu hues a rechasa (den e caso aki) e ponencia di Croes pa rectifica, pasobra e partido den pasado cercano a ‘rectifica caba’. Te na cierre di dia, e mandatario no a avisa mas si e la dicidi pa 'apela' of no.