Ex studiantenan cu debe halto di DUO, no por renoba nan paspoort mas

DEN HAAG/ORANJESTAD – Ciudadanonan cu tin paspoort hulandes y cu tin debe di estudio cu DUO (Dienst Uitvoering Onderwijs) y cu tin un retraso di pago mas grandi cu 5 mil euro, no por renoba nan pasaporte. E tema a keda presenta e siman aki riba e portal Hulandes Trouw, cuestionando e poder aki y si e regla aki ta bay mucho leu. E regla aki a afecta studiantenan di Aruba tambe, cu tabatin un prestamo di DUO. NoticiaCla a tuma contacto cu e representante di DUO, Monique Hoogerwerk riba e tema: “Esaki por cierto no ta nobo. Asina DUO ta traha masha tempo caba” Hoogerwerk di DUO a sigura noticiacla diahuebs.  

E REGLA 

Dienst Uitvoering Onderwijs (DUO) voor studenten en scholieren ta otorga financiamento pa studiantenan, ta reconoce diploma y ta organisa examen.   Segun Hoogerwerk, ta trata di un situacion ora cu DUO no tin adres mas di un ex studiante y cu e studiante aki tin un retraso di pago grandi. E ora DUO ta haci peticion pa pone e persona aki riba un lista di ‘signalamento’. Y unabez cu e persona ta riba e lista, e ta haya limitacion y peticion pa renobacion di paspoort ta un di nan. 

VALIDO PA TUR HULANDES 

For di hefe di Censo na Aruba Sharin Luydens, NoticiaCla a compronde cu e lista di signalamento no ta nada nobo y e lista aki tambe ta aplicabel y valido pa nos (na Aruba). E ta pa tur hulandes (persona cu tin paspoort hulandes). Punto. Segun Luydens, den e ley di Reino cu ta regarda Paspoort tin diferente motibo cu bo por bin riba e S-lijst como hulandes. “Y si Minister van Binnen landse Zaken ponebo riba  S-lijst, den e caso aki riba verzoek di DUO, ningun parti di mundo bo por haci peticion pa renoba bo paspoort Hulandes sin mas y bo peticion pa renobacion lo wordo nenga y bo lo wordo dirigi pa tuma contacto cu e instancia di Reino concerni” Luydens ta sigui bisa. Luydens ta sigui splica cu tanto e paspoort Hulandes como e S-lijst ta regla den e Paspoortwet cu ta conta pa Reino Hulandes den su totalidad y ta aparece entre articulonan 18 pa 25 di e ley. Pa loke ta e asina yama S-lijst of signalerings lijst, tampoco ta algo di awo. “Paspoort ta un aangelegenheid di Reino y den e paspoortwet ta poni ki ora bo por wordo poni riba e S-lijst ey. Tur Burgerzaken den Reino ta haya e S-lijst y ta registra esaki,  pues ora bo bin renoba bo paspoort y bo ta riba e S-lijst bo no por renoba bo paspoort tanten cu bo no wordo kita for di e S-lijst” Luydens ta finalisa bisando. 

COMOSION 

E representante di DUO na Hulanda ta splica NoticiaCla cu enberdad e la haya hopi señalnan di Caribe, a base di e articulo cu a keda publica den e portal Hulandes. Y nan a dicidi awor cu nan ta bay sinta hunto otro siman pa wak si por genera un otro relato di prensa mas riba e tema aki, y trece mas clarificacion di nan banda. 

PROCESO

Segun e proceso, ora cu bo tabata un studiante cu a usa DUO y ta biaha pa exterior (den nos caso dus bolbe cas bek), bo mester duna DUO bo adres nobo. Si bo tin cu paga bo debe y no a duna bo adres internacional, DUO ta traha cu instancianan local y internacional pa haya bo adres. Despues di algun aviso, ta hinca e caso den man di deurwaarder. Y pa esnan cu tin un debe excesivo, ta pone e persona riba e lista ariba menciona, cu ta ‘stroba bo’ di renoba bo pasaporte, y cu ta ‘motivabo’ e ora pa bo cumpli cu bo pago. Pa esnan cu no mester renoba paspoort, pero cu tambe tin un debe halto, bo pasaporte por wordo confisca ora cu bo drenta Hulanda