No por parkeer riba trottoir di Linear Park

ORANJESTAD - Recientemente a instala borchinan nobo riba Linear Park, unda ta subraya e ley di prohibicion pa parkeer cualkier vehiculo di motor riba trottoir of riba e “fietspad”. E borchinan ta sirbi pa concientisa pueblo cu Linear Park no ta pa parkeer auto, pero ta pa uza pa cana, haci ehercicio y core bicicleta.

PROCES-VERBAAL

Polis ta adverti cu lo actua mas severo y duna proces-verbaal na esunnan cu no mantene nan mes na ley. Prome cu a instala borchi, tabata dificil pa Polis actua di biaha, pero awor cu tin indicacion di leu caba, ta duna autoridad mas forsa di ley pa implementa regla y parti sancion mesora.

PROHIBICION PERMANENTE

A instala borchi riba practicamente henter e strip di Linear Park. Tene cuenta cu e borchinan no ta solamente awor pa temporada di campamento, sino lo keda permanente eynan y e prohibicion pa parkeer eyriba tambe ta permanente. Tene cuenta cu bou di ningun circunstancia no mag subi trottoir!