Presidente di SIMAR ta bay retira y muda pa Bonaire pa lidera un team di scol

ORANJESTAD – Actual presidente di sindicato di maestro SIMAR, Josephine Albertus ta bay retira di su funcion di presidente, pa bay establece su mes proximamente na Bonaire unda cu e ta bay lidera un ekipo na un scol na e isla di flamingo. E no ta bisa specificamente ki tempo e ta bay y entrante ki dia su retiro di presidencia di Simar ta drenta na vigor. Albertus ultimo aña a bira un persona hopi vocal y conoci riba Aruba pa su forma ferviente di defende e maestronan pa nan causa. Esaki a dune un posicion hopi popular y tambe tin biaha no gusta pa gruponan pro gobierno, pasobra segun nan, Albertus ta y tabata ataca gobierno sin cu tabatin mester. Kico cu e motibo por ta, Albertus a crea un momentum cu a ubike entre esnan importante pa sindicalismo na Aruba durante e ultimo añanan. 

PERSONAL

Pa loke ta Albertus mes, e ta splica riba su pagina di Facebook di su decision. Aki ta e ta splica tambe cu p.e. tabata riba 27 juli 2017 cu e la yega Aruba cu su famia y a cuminsa un reto nobo den enseñsa. “Pa 16 luna mi a traha cu hopi pasion y dedicacion na EPB Hato” e ta cuminsa bisa. “Alabes mi a traha cu hopi pasion y dedicacion den diferente otro projecto y asina aporta na un manera voluntario na mi isla Aruba”. 

SIMAR

Riba 23 november 2018 e  la cuminsa un reto nobo den mundo sindical como Presidente di SIMAR. “Mi persona semper a traha profesional cu hopi pasion y dedicacion hunto cu mi tremendo bestuur.Mi ta sinti mi mes hopi honra y orguyoso di por a representa e veld di enseñansa conhunto cu mi bestuur, comisionnan y veld di enseñansa. Hunto nos a logra hopi” e ta siguiu splica. 

BONAIRE

Despues e la splica cu ayera riba 1 september 2022 e la anuncia cu pronto e lo bay cuminsa un reto nobo como teamleider di un scol na Boneiro y asina sigui desaroya su mes den mundo di enseñansa. E ta hopi conoci tambe riba e tereno di ayudo na instancianan manera Cruz Cora y ta un persona entrena riba e tereno ey tambe, hunto cu su casa. No ta conoci si henter famia ta muda pa Bonaire (e ta casa cu 4 yiu) of si esaki ta un trabou temporal cu e ta bay eherce.