Basta illegal deteni durante ristramento pa arma

ORANJESTAD - Durante e ultimo dos fin di simannan, Polis a tene diferente accion di “preventief fouilleren” den Oranjestad. Cu un ekipo combina Polis a logra detene algun persona sin nan documentonan na ordo cu ta duna nan permiso di estadia of pa por traha na Aruba y otro sospechosonan pa posesion di arma y droga. E accionnan aki ta den cuadro di e maneho di Mando Policial pa por tin mas presencia di Polis riba caya y ataca e delitonan mas comun cu ta molestia comunidad mas.

LIK OP STUK 

E accion a bay di acuerdo cu e maneho “lik op stuk” (Faya Bo Haya) y a wordo anuncia di antemano, manera prescribi den ley. Varios departamento di Polis, entre otro polisnan uniforma, e ekipo di K-9, Mobiele Eenheid, Cuerpo Especial Aruba y Guarda nos Costa a uni den e control aki.

NACIONALIDADNAN DETENI

Entre e personanan cu a wordo deteni pa falta di permiso, tabatin un persona di nacionalidad Chines y otronan di nacionalidad Dominicano, Colombiano y Venezolano. Ken cu no tabatin un permiso valido of no tabatin un permiso mes a wordo pasa pa Guarda Nos Costa.

MARIHUANA

Den e fin di siman di 28 y 29 di maart tabatin diferente detencion pa posesion di arma di candela y marihuana y atrobe algun persona a wordo pasa pa Guarda Nos Costa pa falta di permiso. Den un caso a detene un persona pa posesion di 49 sakito di marihuana, prepara pa benta. E persona tabatin tambe 2900 florin, cual a wordo tuma den beslag y el a keda deteni. Mester bisa cu den e detencionnan a kita bastante Marihuana for di caminda, pero tambe pa maltrato cu un biga. E biga tabatin clabo na dje, den cual dos hende muhe a dal otro cu e arma aki.

MULTA

Fiscal auxiliar a impone algun boet tambe, pero no tabatin di sumanan mucho halto. Cuerpo di Polis ta sigui cu accionnan di preventief fouilleren durante di henter aña pa kita arma y droga for di caya y aumenta siguridad na Aruba. E accionnan aki ta wordo aproba y anuncia pa medio di Ministerio Publico.