Cornelie: Abusonan contra maestro ta motibo pa accion awe

ORANJESTAD – E accion silencioso di maestronan di Aruba awe, no tin nada di haber directo cu e caso actual di suspension di un maestra na Scol Kudawecha. Mes momento, e secretaria di e sindicato di maestro Simar, Maroeschka Cornelie a bisa si, cu e caso ey tabata e ‘druppel cu tabata falta den e baleña pa e bay over’. Cu esaki tambe, Simar ta splica cu e accion tabata pa bringa tur e ‘irregularidadnan’ cu tin den enseñansa, cu ta data for di tempo di e.o. minister Arthur Dowers ora cu e tabata minister di enseñansa. E accion tampoco ta solamente dirigi pa maestronan y esnan den departamento di enseñansa cu ta cay bou di e ministerio ey. Awe e maestronan cu participa, lo ta bisti na preto, cu un t-shirt special imprimi, riba cual ta describi e situacion di protesta. 

ABUSO CONTRA MAESTRO

Cornelie a splica cu ta trata di abusonan di hopi aña manera maestronan cu a ‘wordo agredi door di alumno’, ‘maestro cu a perde wowo na man di alumno’, ‘maestro cu ta wordo ofendi e insulta’, ‘famia completo ta drenta cura di scol pa bati un maestro’. Asina tin un cantidad di cosnan cu no ta bin dilanti asina asina. Segun Cornelie, cosnan asina no a bin dilanti, pasobra ta trata di un maestro di scol y den comunidad ta verwacht di e maestronan cu e ta perfecto y no ta ‘kibra un kopi’. Sin pensa cu un maestro tambe ta un ser humano cu tur e problemanan cu un ser humano tin.

TA BASTA

A dicidi cu awor ta ‘basta’. Un accion chikito cu sosode, por termina den algo negativo pa e respectivo persona, debi na e efecto di medionan social. “Social media por caba completamente cu un persona. Hendenan cu no tin detayes, ta opina, y lastra hende te na vloer’ Cornelie ta bisa. Como tal no ta dispuesto pa wanta mas.

EFECTO DI ACCION

A mustra cu no ta wanta mas, y a opta pa e tipo di accion silencioso aki. E forma di midi e exito di e accion aki, segun Cornelie, ta via e mesun rednan social, unda cu pa medio di potret cu wordo poni, por haya un indicacion di con grandi e accion tabata. Mas grandi e accion, mas grandi e efecto. Lo evalua despues si e accion aki tabatin efecto, si of no, y si no, lo reuni pa wak kico otro por haci.

CANTIDAD DI MAESTRO

A mustra cu di e 1500 maestro cu tin na Aruba, un total di riba 300 ta miembro activo, esta cu ta paga nan miembrecia y ta miembro registra. Esey no kier men cu e otronan no ta sostene e accion di maestro. E yamada a bay pa tur hende ‘den veld’ esta cu ta maestro, irrespecto si nan ta miembro di e sindicato si of no.